KUMUSTA ang inyong pagsaulog sa bag-ong tuig sa atong mga kaigsoonang mga Insik? Sa unang higayon human sa taastaas nga panahon, wa ko makaapil sa kasaulogan kay sa probinsya ra ko nagpalabay sa panahon.
Hinoon, nakita nako sa mga salida sa telebisyon unsa kamabulokon ug kabibo ang maong kasaulogan di lang sulod sa nasud hasta na usab sa gawas labina sa Tsina mismo.
Akong panghinaut nga matinuod ang mga nindot nga mga panagna alang natong tanan sa gitawag nga tuig sa baboy. Ang mga di maayo? Pangandami kon mahimo unya kalimti.
•••
Ug wa gyud madayon paggamit sa ulohang Spoliarium kay nahimong Alone/Together? ang final nga ulohan sa pelikula nila ni Liza Soberano ug Enrique Gil.
Naglisod tingalig pangitag kalambigitan sa ngalan sa pinintal ni Juan Luna sa istorya sa duha ka mga estudyante nga gidala ni Liza ug Enrique. Basta kay mahitungod kini sa kinabuhi sa estudyante nga di malikayan nga makauyab ug may purohan nga nindot o bati ang epekto niini sa pagtoon.
Ang Alone/Together? isalida sa Peb. 13 isip Valentines presentation Star Cinema. Seguradong daghan ang nag-atang niini kay taudtaud na usab nga way proyekto ang LizQuen.
•••
Usa ko sa mga nahingangha sa bag-ong hitsura ni Celine Dion. Daan na baya to siyang daut pero mas nidaut pa gyud. Morag bukog ug panit na lang gyud ang hitsura.
Di man god siya ordinaryong babaye nga mahimo ra natong pasagdaan ug di tagdon. Siya man god ang tingog luyo sa daghang sikat nga mga awit lakip na ang theme song sa pelikulang Titanic, ang My Heart Will Go On.
Matud pa sa magsisibya ug magsusulat sa Manila nga si Jobert Sucaldito, morag nagkinahanglan gyud og ‘psychiatric advice’ ug tabang sa di pa kini mosangko sa tsugi portion.
•••
Gibati sab kog garbo human modayeg ang mga hurado sa The World’s Best sa tulo ka bagets sa TNT Boys. Nindot ang pag-blend sa ilang tag-as kaayong tingog sa kantang Listen.
Nahatagan usab og moment si Pops Fernandez gipasulti mahitungod sa performance sa mga bagets gikan sa Pilipinas.
•••
Premature campaigning kuno ang pagsalida sa Bato nga kaagi ni retiradong PNP Chief Ronald dela Rosa. Hasta ang pag-appear ni Bong Go sa Gandang Gabi Vice karong bag-o ug sa Maalaala Mo Kaya karong Sabado.
Unya wa na lay kwenta ang mga television ads sa daghang mga kandidato? Ambot oiest!