KON hilig ka sa mga karaan apan maanindot nga mga monumento ug edipisyo, bisitaa ang Toledo.
Di Toledo sa lalawigan sa Sugbo ang akong pasabot kon di ang Toledo sa nasod sa Espanya.
Nabantog ang Toledo di lang sa ilang mga maanindot nga karaang istruktura apan lakip na sa ilang mga lamian nga mga pagkaon.
Gawas sa pagsilbing kapital nga dapit niadto, nailhan sab ang Toledo nga “Imperial City” tungod kay mao man ni ang main venue sa korte ni Charles V, ang Holy Roman Emperor.
Nailhan pa sab ang Toledo isip “City of the Three Cultures” tungod sa impluwensya sa mga Kristiyano, Muslim, ug mga Hudeyo sa ilang kasaysayan.
Sa maong dapit sab natawo ang mga historical figures sama nila ni El Greco, Brunhilda sa Austrasia, Al-Zarqali, Garcilaso de la Vega, Eleanor of Toledo, Alfonso X, Israeli bin Joseph, ug Halevi.
Niadtong 1986, ang Toledo, kapital sa Probinsya sa Toledo sa Castile-La Mancha region, gideklarar nga usa ka World Heritage Site sa United Nations Educational, Scientific and Cultural Organization (Unesco).
Di mominos sa 30 ka mga monument, museo ug mga karaang edipisyo ang makita sa dapit.
Kon mobisita mo didto, adtua ang Catedral de Toledo, ang Alcazar Army Museum ug Museo del Greco.
Tilawi sab ang ilang sikat nga hamon iberico ug lamiang marzipans, usa ka delicacy nila.
Nailhan sab sa paghimo og mga mahait nga hinagiban ang Toledo maong nagpasad bisan asa ang mga shops nga nagbaligya niini isip mga souvenir sama sa espada ug kutsilyo.
Gamay nga dakbayan lang ang Toledo, maong malibot ra kini ninyo sud sa usa ka adlaw.
Sa pagbisita sa Superbalita Cebu sa dapit, nalibot ra ning tigsuwat ang dapit sud lang sa usa ka hapon uban sa akong higala nga si Patricia gikan sa Bacolod.
Apan wa namo bisitaa ang mga mga museo sa dapit tungod kay makalibog kung unsang museo ang among unahon. Ang entrance fee sab sa matag museum nagkatidad og 2-6 euros (P120-P400).
Gikan sa Madrid, maabot ninyo ang Toledo pinaagi sa Renfe (fast train) sud mga 30 minutos, pribado nga sakyanan sa usa ka oras o bus sa 1.5 oras.
Sa pagtapos sa among pagbisita sa Toledo, nisakay mi sa ilang local train nga molibot sa tibuok dakbayan diin inyo sab makita ang 360 panoramic view sa dapit. Ang pagsakay sa Toledo Trainvision nagkatindad og 6.50 euro o anaa sa mga P390.