MIATRAS ang Los Angeles Lakers sa ilang tinguha nga mabira ang superstar sa New Orleans Pelicans nga si Anthony Davis.
Kini human nga wa na makauyon ang management sa gibungat ug gipangayo sa Pelicans bugti sa ilang pagbaylo sa 25 anyos nga si Davis.
Matod pa sa tinubdan nga gusto sa Pelicans nga madugangan ang una nang gitanyag sa Lakers ngadto kanila.
Sa sayo pa, gikataho nga ang Lakers andam mobaylo nila ni Lonza Ball, Kyle Kuzma, Brandon Ingram, Josh Hart, Ivica Zubac ug Kentavious Caldwell-Pope ug ingon man duha ka first round draft picks.
Apan bisan pa man niini, wa matagbaw ang Pelicans sa maong tanyag ug gusto niini nga moabot ngadto sa unom o walo ka draft picks ang madugang.
Kini maoy nakapasagmuyo sa Lakers hinungdan nga hangtod ning pipila na lang ka gutlo sa dili pa moabot ang deadline sa binayloay og mga players pabilin pa gihapon nga Pelican si Davis kinsa mipadayag nga gusto kining makigkauban ni James.
Karong adlawa, maoy gikatakdang pagkapupos sa gihatag nga kahigayonan sa pag-trade og mga players ning nagpadayon nga season.
Gikataho nga gipahibawo na ni Magic Johnson, presidente sa basketball operation sa Lakers, si Dell Demps, general manager sa Pelicans, nga dili na sila modugang pa sa ilang tanyag.
“They wanted more and more and more,” matod sa usa tinubdan nga nakutloan sa Times Magazine. “There was no more to give... the more they wanted the more it because outrageous and unrealistic.”
Gilakip usab ni Davis ang Milwaukee, New York Knicks ug Los Angeles Clippers sa mga teams nga gusto niyang balhinan.
Dunay laraw nga posibling dili lang una paduwaon si Davis sa umaabot nga All-Star sa NBA sa Chicago sa rason nga tingali og ma-injured pa una kini nga wala pay klarong team nga kapadulngan.
“It’s going to eventually get resolved,” padayag ni Pelicans coach Alvin Gentry. (JBM)