YANONG gikuniskunis sa defending champion Golden State Warriors ang San Antonio Spurs, 141-102, sa nagpadayon nga National Basketball Association (NBA).
Si Kevin Durant mipaksit og 23 puntos, siyam ka asssists ug walo ka rebounds, samtang si Klay Thompson miyagyag og 26 aron pangulohan ang Warriors kinsa nagsugod sa pagpakita sa ilang kabangis sa second ug third quarter alang sa maong kadaugan.
Sa third quarter lang, ang Warriors mitali og 49 puntos nga gilamasan og 16 ka assists, ug sa samang higayon, mipabuto og lima sa pito ka itsa sa three point area.
Dili man tuod kaayo eksplosibo sa maong duwa, apan si Stephen Curry nakatampo og 19 puntos, pito ka assists, lima ka rebounds, duha ka steals ug usa ka block.
Dominado sa Warriors ang panag-engkuwentro nga gani wala na nila pasudla sa fourth quarter ang ilang mga starters.
Si Patty Mills nangulo sa Spurs nga may 16 puntos, upat niini tres. Kini maoy ikaduhang sunodsunod nga pildi sa Spurs kansang lima ka sunodsunod nga daog naputol sa Sacramento Kings niadtong Martes, 127-117.
Kagahapon, gipapahuway ni coach Gregg Popovich ang iyang mga sinaligan nga sila si LaMarcus Aldridge ug DeMar DeRozan.
Ang sentro sa Warriors nga si DeMarcus Cousins mitapos sa duwa nga may 15 puntos.
Samtang sa laing duwa, mihagdaw og 19 puntos ang rookie nga si Luka Doncic sa iyang ikatulong triple-double, Doriam Finney-Smith midugang og 15 puntos ug 10 ka rebounds sa kadaugan sa Dallas Mavericks batok sa Charlotte Hornets, 99-93.
Solido usab nga nasubhan sa Dallas ang bag-ong nakuha na si Tim Hardaway Jr. nga milabnot og 12 puntos.
Si Hardaway usa sa nalakip sa blockbuster trade nga naglakip usab kang Kristaps Porzingis gikan sa New York Knicks.
Wa pa makaduwa si Porzingis tungod sa iyang angol sa tuhod.
Sa third quarter quarter, si Harrison Barnes mipugnit og siete sa iyang kinatibuk-ang diyes puntos apan wala na kini paduwaa sa fourth quarter human mabaniog nga gi-trade na siya ngadto sa Sacramento Kings bugti ni Zach Randolp ug Justin Jackson.
Si Kemba Walker mipakli og 30 alang sa Hornets. (JBM)