MGA duwa karon:
(Carcar City Sports Complex)
6:00 pm. - Minglanilla vs. San Fernando
8:00 pm. - Talisay City vs. Carcar City
Kasaysayan maoy nagpahipi sa dihang suwayan sa paglangkat sa Talisay City Aquastars ang kampiyonato sa 3rd Samsam Gullas Cup Inter-Cities/Municipalities 20-under basketball tournament nga motapon karong gabii sa Carcar City Sports Complex.
Lab-as pa gikan sa ilang saktong dominasyon sa ilang pag-host sa Carcar City Lechoneros, 90-72, sa Game One niadtong Martes sa best-of-three series, tinguha ug anaa karon sa alimpatakan sa Aquastars ni coach Rey Michael Gurrea nga motapos sa tournament nga walay pildi, sama sa ilang gihimo sa 2nd Governor’s Cup sa niaging tuig.
“One game at a time ra gyud ang atoang giingon sa mga bata. Wa man gyud ta mag-expect nga moabot ta ana nga sitwasyon. But we will try kay naa na man gyud na,” matod ni Gurrea sa dihang gikahinabi sa Superbalita.
Sa kinatibuk-an, ang Talisay nakakulit na og 22-0 nga record.
Hinuon, giangkon ni Gurrea nga adunay kapabilidad ang Lechoneros nga makabawi sa Game Two, ubos sa pagdumala ni kanhi PBA mainstay Anton Villoria, kinsa sa unang higayon, maoy nakagiya sa Carcar ngadto sa finals.
“Kulatahonon ra gud mi sa una. Karon nakaabot mi og finals bisan gagmay among lineup. Lipay na kaayo si mayor ani,”matod sa usa sa mga coaching staff ni Villoria.
Ang Carcar mitapos sa elimination round nga bugtong ang Talisay ra ang nakapildi (4-1). Ila usab ngs gipukan ang laing title-favorite Minglanilla Archangels, ang unang kampiyon sa Governor’s Cup.
Gitumbok ni Gurrea nga ang igong suporta sa dakbayan ug sa mga team officials ilabi na nila ni konsehal Rudy Cabigas ug sa team manager niini nga si Jack Alvin Rabaya maoy dakong hinungdan sa kadasig sa mga player.
Gipasalamatan usab niya ang iyang mga coaching staff nga gipangulohan nila ni Jury Violango ug Arvie Cabanero.
Sa gihapon, ang Aquastars mosandig sa kalantip nila ni Jay Deiparine, Keaton Clyde Taburnal, Rudy Beduya, John Elmer Villabrille, Raffy Bacasmas ug Michael Tabay Jr.
Samtang si Villoria, sa iyang bahin, maglaom sa iyang mga pambato nga sila si Leonilo Martorillas, Nino Angelo Baclay, Rey Joseph Alfeche, John Karl Alfafara ug Josemaver Cantina nga maoy motrabaho sa opensa. Ang duwa sugdan sa alas otso sa gabii.
Sa first game, magkombati ang Minglanilla ug ang San Fernando Spartan alang sa third place honor sa alas 6 sa gabii. (JBM)