NATAGBAW si Gob. Hilario Davide III sa resulta sa duha ka semana nga imbestigasyon sa Police Regional Office (PRO) 7 ug sa Cebu Provincial Police Office (CPPO) sa pag-ambush kang San Fernando Mayor Lakambini Reluya ug mga kaubanan.
Nalipay siya nga duna nay nailhan nga mga suspek sa krimen ug nanghinaot siya nga madakpan sila sa kapulisan.
Sa laing bahin, tungod sa kaguliyang sa San Fernando nga niresulta sa pagpatay sa daghang mga opisyal ug kandidato sa umaabot nga eleksiyon, uyon ang gobernador nga ipaubos ang dapit sa Comelec control.
Human ang duha ka semana nga ultimatum nga gihatag ni PNP chief, Director General Oscar Albayalde sa PRO7 ug sa CPPO, niresulta kini sa pagkatribukar sa duha ka mga suspek sa pagbanhig sa sakyanan ni Mayor Reluya niadtong Enero 22.
Kini mao silang Jerome Labitad ug Felix Abacajan, Jr., nga, matod pa, parehong nagsilbi nga mga gunman atol sa pagpamanhig, nga nikalas sa bana sa mayor nga si Kapitan Ricardo “Nonoy” Reluya, Jr., ug duha pa ka mga indibiwal.
“The fact nga duna na’y suspects, dapat ang police, they have to pursuit these suspects. Ila gyud nang dakpon. And then hopefully, we will find out kinsa’y nagpaluyo anang ambush. Ma-resolve ang kaso,” niingon si Davide.
Wala pa hinuon mailhi ang mastermind sa krimen apan gihulagway sa gobernador nga ang pagka-ila nilang Labitad ug Abacajan, maayo na kaayo nga kalambuan kon itandi sa nahitabong pagpatay nilang Ronda Mayor Mariano Blanco ug Bise Mayor Jonah John Ungab niadtong Septiyembre ug Pebrero sa miaging tuig.
Sa kaso nilang Blanco ug Ungab, wala gyuy natumbok nga mga suspek o mastermind ug hnagtud karon, walay kalambuan ang maong kaso. (AZLG)