HATAGAN una og tulo ka adlaw sukad sa pagsugod sa campaign period sa Commission on Elections (Comelec) ang mga kandidato nga nagpataka lang ug amuntar sa ilang campaign materials nga boluntaryong motangtang niini.
Kini sa dili pa nga ang mga tinugyanan sa komisyon maoy molangkat niini ug mopasaka og election offense batok sa mga hingtungdang kandidato sa piniliay.
Gawas sa mga campaign poster, duna’y mga kandidato nga nagpahimo gyud og billboard aron pagpaila sa ilang kaugalingon.
Matod ni acting provincial election supervisor, Atty. Jerome Brillantes, 2x3 feet lang o susama kadak-a ug cartolina ang maximum nga sukod sa campaign poster nga mahimong magamit sa mga kandidato sa pagpangampaniya.
Hinuon, subling giklaro sa Comelec nga dili pa kini makasugod sa pagpanangtang sa mga illegal campaign poster sa pagka-karon.
Sigun ni Brillantes nga atol sa campaign period, mahimong sugdan ang pagpanangtang niini.
Gitakda nga magsugod ang campaign period alang sa national candidates karong Pebrero 12 ug Marso 29 alang sa mga kandidato sa lokal nga posisyon.
Ang pagpamatung ug campaign posters sa mga kandidato karon nga wala pay campaign period, gitumbok ni Brillantes nga mahulog lamang nga pagpa-ila ingun man pagpadayag sa kaugalingon ug di pagpangampaniya.
“Even though walay vote or re-elect, klaro man gud nga para gyud na sa ilang candidacy,” niingon si Atty. Brillantes.
Atol na unya sa campaign period, gipadayag sa Comelec nga kinahanglang ang matag barangay dunay common poster area, diin ang tanang mga kandidato makapahimutang sa ilang campaign materials.
Giangkon sa Comelec nga kuwang sila og manpower nga makahimo unya sa pagpanangtang sa illegal campaign posters.
Subay niini, gitumbok ni Brillantes nga magpatabang sila sa fire department, sa engineering department sa matag lokal nga kagamhanan ug sa kapulisan aron pagpatuman sa ilang operation baklas sa campaign materials. (AZLG)