SA Pilipinas nahitabo ang labing ngilngig nga trahedya sa dagat ug daghang kaso sa pagkalunod sa barko.

Mao kini hinungdan nga dunay moingon nga ‘naglutaw nga lungon’ ang mga barkong naglawig sa nagkalainlaing isla sa Pilipinas.

Click here for stories and updates on the Sinulog 2010 Festival.

Karaan na o surplus lang ang mga barko nga pangpubliko nga naglawig sa kadagatan.

Hinuon, ang maong mga barko gipaubos sa higpit nga pagsusi sa ahensya sa kagamhanan una tugotang makalawig. Apan, nganong daghan gihapong panghitabo?

Si Maria Elena Bautista, administrador sa Maritime Industry Authority (Marina), nipakanaog bag-ong ‘shipping standard’ sa paningkamot nga mapapas sa di maayong imahen sa maritime sa nasod ug labaw sa tanan - ang kaluwasan sa mga pasahero ug tripolante.

Apan ang operators mingsupak tungod sa giingong ‘di makab-ot nga standard’ ug nagplano og ‘shipping holiday’ o di paghiyahe sa mga barko karong Marso 1. Kon mahinayon kini, dako og epekto sa ekonomiya sa nasod.

Ang barko maoy nag-unang kargahanan sa mga produkto ug sakyanan sa masa sa kabus nga nasod nga gibahin sa kapin sa siyete mil ka mga isla.

Ug ang pagpakabana sa kaluwasan sa paglawig sa dagat kanunay seryusohon lang matag higayon human sa ngilngig nga panghitabo.

Nasayod kita nga dunay bug-at nga rason ang tinguha ni Bautista sa Marina sa iyang pagluwat sa ‘shipping standard.’ Apan maayong dunay dayalogo tali sa shipping operators alang sa malahutayong solusyon sa pagpapas sa di maayong imahen sa maritime sa nasod.