USA sa mga karaang kompaniya sa barko nga nagbase sa Sugbo, susama usab kakaraan ang iyang nagbiyahing mga barko sa rota nga Cebu, Dumaguete ug Dapitan (Dipolog).
Sama sa ubang karaang barko gikan sa laing kompaniya nga naglawig hangtod karon, ehemplo kini sa gitawag nga “naglutaw nga lungon.”
Niadtong Miyerkules Santo, usa sa iyang mga barko kalit nga napalong sa tungatunga sa lawod sa habagatan sa Sugbo human sa kapin sa tulo ka oras nga paggikan sa puwerto sa Sugbo padulong sa Dapitan.
Maayo na lang nga maayo ang kondisyon sa dagat taliwala sa gikataho nga low pressure area (LPA) human sa bagyong “Domeng.” Human sa kapin sa duha ka oras, nakalarga og balik ang barko ug luwas nga nakadunggo sa pantalan sa Dapitan. Apan pagkasunod sunod adlaw, susama ang nahitabo, nitiurok na usab ang barko sa lawod.
Dakong risgo kay puno sa pasahero human ting-uli nga panahon sa Semana Santa ug kon nahitabo pa kini atol sa dautang panahon.
Ang maong barko taudtaod nga wala nakabiyahe human gipaayo apan, gipugos sa pagpadagan tungod sa kadaghan sa pasahero tungod sa taas nga bakasyon? Pagkahakog. Wala magtan-aw sa kaayohan sa giserbisyohang publiko.
Mga sinyales kini sa posible nga dakong panghitabo kon dili dayon masanta ang pagpadayon sa operasyon sa mga naglutaw nga lungon, diin dakong hagit sa mga kompaniya nga mouban sa paglupad sa modernisasyon.
Manawagan kita sa Department of Transportation and Communication (DOTC) sa paghimo sa dinaliang pagtagad ug paghatag og tagal sa paglubong na sa dayon sa mga naglutaw nga lungon sa kadagatan.