Problema sa pagbaha sa Paknaan naa nay kasulbaran

MASULOSYUNAN na unya ang problema sa pagbaha, diha sa may 6.5 ektarya nga luna nga relocation site sa Barangay Paknaan sa Dakbayan sa Mandaue, human nga ang kagamhanan sa ang napili nga benipisyaryo sa 100 milyones pesos nga balor sa mga proyekto sa 13 ka land developers, pinaagi usab sa Housing Land Use Regulatory Board (HLURB).

Kini human nga nagpinirmahay og kasabutan (Memorandum of Agreement) Huwebes sa hapon, Pebrero 7, sila si Mandaue City Mayor Luigi Quisumbing ug Atty. Lloyd Christoher Lao ang pangulo sa HLURB, diha sa Paknaan Gymnasium.

Gipasabot ni Vice Mayor Carlo Fortuna, nga mismo si Pangulo Rodrigo Duterte, ug sa tabang usab ni kanhi SAP Bong Go, hinungdan nga napili sa HLURB nga ang kagamhanan sa dakbayan sa Mandaue ang makabenipisyo alang sa drainage improvement, pagpasemento sa kalsada ug ang pagpaanindot sa mga bakante nga luna sa Paknaan relocation site.

Ang pagpalambo sa mga kanal o drainage, usa sa nakita nga dako nga makatabang nga masulbad na ang problema sa pagbaha sa maong lugar, panahon kon mag-ulan-ulan ilabi na usab kon taob.

Ang proyekto mobalor og P100 milyones, wala’y gastuhon ang gobyerno, human nga ang 13 ka mga land, housing ug condo developers ang mogasto na niini.

“It is a first for the City and first for HLURB, especially in Cebu, the housing and condo developers are supposed to set aside 15 percent of the area they develop or equivalent amount to that for socialized housing, under the Balanced Housing Development Program. They can put that allocation to any socialized housing program sa local government unit. So we are very thankful to Pres. Duterete, to SAP Bong Go, kay they instructed HLURB to proceed with the plan where i-pull tanan ang socialized housing credits of the 13 housing developers into a fund that will be used for drainage improvement, road pavement and development of open space of any socialized housing project of a LGU,” pasabot ni Fortuna.

Dul-an sa tres mil ka mga molupyo sa maong dapit ang maka-benipisyo niini.

Ang maong proyekto ang sugdan su’d ning bulana, ug gilantawan nga mahuman sulod ra usab sa duha ngadto sa tulo ka bulan.