NANGAMATAY diha-diha ang tulo ka mga hamtong magsuong lalake human panigbasa ug dunggaba sa ilang ex-convict nga silingan nga nag-amok alas 4:40 sa Biyernes sa hapon, Pebrero 8, sa sityo San Isidro, Barangay Perrelos, Carcar City.
Pagdumot ang nitumaw nga motibo sa pagpatay.
Mga biktima giila ni PO3 Jomarie Villar, imbestigador sa Carcar Police Station, nga sila si Carmelito, 60, barangay tanod sa Valladolid; Conrado, 65, ug Eufronio Garces.
Ang suspek nga ex-convict giilang si Emilio Manayaga, 41, mag-uuma, silingan sa mga biktima.
Si Villar, sa interbyu sa Superbalita Cebu, niingon nga nagduwa og dama si Carmelito uban sa silingan.
Kalit nga niduol si Manayaga nga nagdala og sanggot dayon nitigbas kang Carmelito sa ulo, liog ug ubang bahin sa lawas.
Dihang nakakita si Conrado sa gibuhat ni Manayaga sa iyang igsuon, iya kini untang gitabangan bisan kon wa siyay bitbit bisan unsa aron unta ikapanalipod sa iyang kaugalingon.
Siya na usab ang giatubang ni Manayaga ug gitigbas ug gidunggab na usab siya sa nagkadaiyang bahin sa lawas.
Sama kang Carmelito, si Conrado namatay usab diha-diha tungod sa kadaghan sa mga samad sa iyang lawas.
Mga 50 metros gikan sa nahitaboan, nahimutang ang barbershop sa anak ni Eufronio, diin siya nahinanok sa pagkatulog samtang naglingkod.
Nidagan si Manayaga ug nisulod sa barbershop dayong atake kang Eufronio, kinsa nahinanok sa pagkatulog samtang naglingkod sa lingkuranan.
Wa na makadagan pa si Eufronio ug makapanalipod sa iyang kaugalingon.
Si Villar niingon nga human sila makadawat og tawag kalabot sa hitabo, ila dayon kining girespondihan.
Sa ilang pag-abot, ilang nakaplagan ang mga lawas sa magsuon nga naglunang sa dugo.
Ila usab dayon nga giadto ang balay ni Manayaga, kinsa nitahan kanila kuyog sa iyang asawa.
Matod ni Villar nga hubog pa si Manayaga dihang ilang gidakop ug gipusasan. Nihisgot kini nga naglagot siya sa magsuong Garces kay gisumbong siya sa ilang barangay kapitan.
Apan matod ni Villar nga wa nila masayri unsa ang gisumbong sa magsuon.
Sa pagsuwat ning taho, si Manayaga gitanggong na sa Carcar Police Station.