NAPASULOD ni Rajon Rondo ang iyang buzzer-beater 20-foot jumper aron agakon ang Los Angeles Lakers sa makapakugang nga kadaugan batok sa host Boston Celtics, 129-128, kagahapon sa National Basketball Association (NBA).
Gipasabot ni Rondo nga kanunay niyang gipraktis ang maong kalit nga jumpshot apan ang nakapaukyab sa iyang dughan nga mao kini ang nakapadaog sa Lakers sulod sa balwarte sa Celtics.
“I practice those shots all the time,” matod ni Rondo. “Couldn’t imagine it being in the Garden though. ... This is one I’ll be playing for the rest of my life.”
Ningsikit na unta sa ganghaan sa kadaugan ang Celtics dihang nakamugna kini‘g 128-127 nga labaw pinaagi sa lay-up sa ilang lider nga si Kyrie Irving sa nahabiling 11 ka mga segundos.
Sa return play, napalakan ni Al Horford ang itsa ni Lakers forward Brandon Ingram ug sa wala damha, nakuha ni Rondo ang bola gikan sa inilugay sa rebound.
Wala’y giusik nga oras ang beteranong pointguard ug miitsa dayon kini alang sa iyang nakapadaog nga puntos tatawng nakahupay sa kauwaw sa Lakers gikan sa ilang 42 puntos nga pagkalubong batok sa Indiana Pacers sa miagi nilang duwa.
Gipangulohan ni LeBron James ang Lakers pinaagi sa iyang triple-double nga 28 puntos, 12 rebounds ug 12 assists.
Sukad masukad, si James maoy ikatulo pa lang nga magduduwa sa Lakers nga nakahimo og triple-double sulod sa balwarte sa Celtics sunod nila ni Magic Johnson ug Elgin Baylor.
Si Kyle Kuzma nidugang og 25 puntos, nitampo og 17 puntos matag usa sila si Rondo, JaVale McGee ug Kentaviuos Caldwell-Pope.
“I’m starting to get more and more back to myself,” matod ni James, kinsa dili pa lang dugay nga nakabalik gikan sa pagkaangol niadtong Disyembre 26 (RP time) sa miaging tuig.
“Every possession, every quarter, every time I take a hit, I’m able to nudge it off and keep going. I’m working my way back and I’m getting better and better every single minute.”
Ang Celtics gipangulohan ni Irving pinaagi sa iyang 24 puntos, nihatag og 22 puntos si Jayson Tatum, nidugang og 20 puntos Daniel Theis, niamot og 19 puntos si Terry Rozier samtang nitampo og 18 puntos si Jaylen Brown.
Hinuon taliwala sa kapildihan, ang Celtics nakadawat og maayong taho gumikan kay magpabilin sa ilang kiliran si Tatum human napupos ang trade deadline.
Si Tatum usa sa mga magduduwa nga gihandom sa ubang teams.
“I’m happy to still be on the team. I’m glad that it’s over with for now,” matod ni Tatum. (AP, ESL)