Talento: Welcome to Pinas

MAAYONG Sabado! Kumusta po?

Sugod petsa uno hangtud otso ning Pebrero sa kasamtangang tuig, hago kaayo ang akong kalawasan. Ang bulsa medyo nauga tungod sa mga galastuhon nga nadamay lamang tungod sa mas importanteng hinungdan.

Bitaw, aduna koy mag-asawang langyaw nga bisita gikan sa nasud Vietnam, ug sila ang hinungdan nga na-busy ning inyong kaibigan. Gilaag nako sila sa mga nindot nga dapit sa rehiyon onse diin naapil pod ko'g kalingaw, pare.

Pagkanindot didto sa Prayer Mountain sa Tamayong, Calinan. Ang chocolate ice cream sa Malagos Garden makapapiyong og mata sa kalami.

Natagbaw pod sila'g langoy-langoy didto sa PearlFarm Resort sa tulo ka adlaw. Pagkanindot man diay didito sa Taklobo farm apil na ang Hagimit Falls. Kaniadto, kabaw ray kadungan namo'g kaligo, apan karon, nagkadaiyang turista na ang atong makasabayan.

Huwebes sila naabot sa Panabo diin gipasulay nako'g kaon nga nagkinamot sa among balay, migo, uban sa pipila ka mga higala nako. Lami daw kuno ang humba pero ang bulad nga lapulapu- gisupsop apil ang bukog.

Tungod bisita ug taga laing nasud sila, natural gayud kanato nga moabiabi kanila. Dili pod diay lalim kung ikaw ang mag-tour guide unya ang imong sapi alanganin no? Maayo na lang anaa ang akong pamilya ug higala nga ningtabang kanako.

Matud pa sa mga bisita, ginadili sa ilang embahada ang moadto sa atong nasud tungod sa mga terorista. Maayo na lamang nga nagapanubay sila sa balita sa dakbayan sa Dabaw mao gipili nila kining adtuan.

Unsa man pod ning ubang mga tawo, imbis motabang sa paglambo sa atong nasud- nagsamuksamok na hinuon.

Bitaw, pahinumdom lang pod sa adunay mga langyaw'ng bisita, dili nato "tigbason" sa panguwarta ha? Makapahimulos man ka kanila apan ikaw ang hinungdan nga matagam moduaw sa Pinas, higala. Madamay ang imahe ug pagpaningkamot sa gobyerno ug mga kaigsuonan natong nanginabuhing disente tungod nimo. Klaro?

Imbis mabulahan ang daghan, madaut na hinuon tungod sa kahakugan. Magpabilin kitang mainiton modawat sa atong mga bisitang lokal o langyaw man, aron happy lang ang tanan- getch?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph