DILI pa mahinayon ning tuiga ang pagkutay sa tulay gikan Davao City padung Island Garden City of Samal (Igacos) sa Davao del Norte gumikan sa mga rason.
Sumala ni Department of Public Works and Highways (DPWH) Secretary Mark Villar nga magkinahanglan pa kini og taas nga panahon labi na nga sa ikatulong kwarto pa ning tuiga mahuman ang feasibility study nga nagsugod sa miaging tuig.
Giingon sa opisyal nga human sa feasibility study, matigayon pa ang pag-award sa modaug sa bidding alang sa mga himan ug ang paghimo sa design-and-build ug ang procurement.
“Davao-Samal bridge feasibility studies are already ongoing, last year pa ‘yong feasibility study [nag start]. Matatapos siya by third quarter this year. Usually feasibility study takes one year pag malaki ang project so we can expect that by third quarter this year matatapos na,” ingon ni Villar sa ambush interview, kagahapon Biyernes, Pebrero 8.
Gipasalig niini nga sa 2020 magsugod ang construction ug gipaneguro nga mahuman ang maong multi-billion nga tulay una mahuman ang termino ni President Rodrigo Duterte.
“Yong procurement can start this year baka yong initial, pero yong full construction, next year, pero yong simula this year,” ingon ni Villar sa pakighinabi sa SunStar Davao atol sa inauguration sa Slaughter House sa F. Torres Bypass Road.
Ang maong Chinese-funded Davao-Samal Bridge maoy usa sa mga pinakadako nga infrastructure project ubos sa flagship ning kasamtangan nga gobyerno nga “Build, Build, Build” program nga nagtumong aron maablihan ang mga bag-ong dalan alang sa economic growth ug development tali sa duha ka mga siyudad.
Giingon ni Villar nga ang maong feasibility study maoy advance stage sa plano diin gibana-bana nga sa ikatulo nga kuwarter ning tuiga makompleto na ang design-and-build diin ang pagpamalit sa mga himan ang mosunod human ma-award ang bidding ngadto sa contractor.
Ang entry point sa maong tulay mao ang gikan sa Davao nga magsugod sa Sasa ug ang iyang utlanan didto sa Samal ngadto sa Babak District.
“Patatapusin muna namin ang feasibility study and we’ll be ready to implement the bridge,” pasalig ni Villar.
Kung kahinumdoman, nag-trending sa social media nga Facebook ang migula nga usa ka artikulo sa mantalaan nga miingon si Davao City Mayor Sara Duterte-Carpio nga maghikog siya kung di mahinayon ang Davao-Samal bridge sa termino sa iyang amahan.
Hinuon subay sa pasalig sa DPWH, mahinayon ang paghimo sa tulay sa sunod tuig.