Albor: Quisumbing malutoson diay

MITUMAW ang bulok sa pagka-maginukdanon ni Mayor Luigi Quisumbing sa Mandaue City. Gitaktak ang mga job order employees (JO’s) nga nagtrabaho panahon pa sa mga Ouano ug Cortes. Ubay-ubay ang gitangtang sa trabaho nakulban sa kaldero ang pamilya. Ang mga regular employees nga protektado sa Civil Service Commission (CSC) nga mga appointee ni Cortes gisilotan pinaagi sa pagpabalhin og laing departamento nga dili haom sa ilang kasinatian. Usa sa mga naapektohan ang Officer III sa City Social Welfare nga si Michael Allan Pielago nga gibalhin sa Housing and Urban Development nga nahimutang sa second floor nga maglisod og saka kay person with dis-ability (PWD). Nahagbong ra ba kay natapigas ang crutches. Pastilan gilutos bisan dunay kabilinggan sa panglawas. Luoy kay gidaginot pa gyod mupay kimpang hinoon gigasahan sa Ginoo og lantip nga pangisip. Subay niini si Pielago misang-at og kaso nagdto sa Ombudsman batok Quisumbing nga kalapasan sa Magna Carta for Dis-abled Persons, oppression ug kalapasan sa Anti-Graft and Corrupt Practices Act (RA 3019)

Laing wala makaantos sa tataw nga pagpanglutos sila Damaso Tumulak, Andres Suson, Danna Jane Escalante ug Florentino dela Paz Jr. misang-at og kaso ngadto sa Ombudsman nga grave misconduct, oppression ug kalapasan sa Anti-Graft and Corrupt Practices Act. Si Tumulak nga pangulo sa Human Resource ug si Suson nga assistant sa City Engineering gibalhin sa Umapad Dumpsite Task Force sama rag gipahingos sa basura kay dili sila hanas sa maong matang sa trabaho. Wala rabay basura nga humot. Sila si Escalante nga staff sa Human Resource ug dela Paz nga admin assistant sa City Sports Commission gidestino usab sa dumpsite. Silang Tumulak ug Suson unang mipadangat og reklamo sa CSC niadtong Hulyo 2018 sa katarungan nga wala mahisubay sa ilang kaantigohan ug gitagana nga trabaho. Sa ilang apelasyon, ang CSC miisyo gilayon og direktiba nga nagmando ni Quisumbing sa pagpahunong sa implementasyon sa pagbalhin nunot sa memorandum nga ibalik sila sa naandang katungdanan. Apan nagmagahi ang mayor wala tumana ang resolusyon o kamandoan sa CSC.

Sa maong kontrobersiya milanat og lima ka bulan nga wala silay sweldo. Wala makabayad sa ilang utang nagmugtok ang giutangan. Maayo gani kay nahimong dalangpanan ang CFI. Wala usab pirmahi ni Quisumbing ang ilang notice of salary adjustment, bonus, lakip nga giputol ang ilang communication load allowance. Ang kaso nga gipadangat sa Ombudsman ginuntan sa pangaliya nga ipaubos sa preventive suspension si Quisumbing aron dili magamit ang gahom sa paglubag, pag-inpluwensya, paghudlat ug pagguba sa mga papeles sa ipahigayon nga inbestigasyon. Sanglit may igong basihanan ang maong kaso ang Ombudsman miawhag ni Quisumbing sa pagsumitir og counter affidavit. Duol nalang ang eleksyon atong paaboton unsay linugdangan. (csa_1156@yahoo.com/09064648954)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph