TUNGOD sa Passport on Wheels (POW), kining tagsuwat nakapa-renew sa akong pasaporte nga mo-expire na karong Oktubre.
Kini ang akong kasinatian.
Lima ka minutos ra tuod ang online appointment apan, atol sa akong pag-process sa akong renewal, naabot ko og kapin duha ka oras ang akong pagpaabot.
Ngano?
Dili tungod kay hinay ang proseso apan, tungod sa kadaghan sa nagkuha usab sa ilang passport.
Bag-o lang giablihan sa Department of Foreign Affairs (DFA) and POW sa SM Seaside niadtong Pebrero 4 ug daghan ang nakapahimulos niini.
Pebrero 6 ko naka-schedule ug alas 4:00 sa hapon hangtod sa alas 5:00 sa hapon kini.
Kon subayon nimo ang proseso sa paglukat og passport sa POW, dali na lang kaayo kini ug upat na lang ka hugna ang proseso.
Kini human tanan online appointment sa passport, kinahanglan bayran daan bag-o makompirmar imong porma:
Step 1 - Tan-awn sa personnel ang imong printed nga form ug i-verify kini sa ilahang data base.
Step 2 - Processing/Interview: Mao na kini nga pangitaon ang imohang requirements kon bag-o ka nga aplikante o renewal.
Tip: I-photocopy daan ang imohang requirements lakip na ang passport data kon renewal ka.
Step 3 - Courier payment: (promise! diri ka malangay) Mao ni nga magbayad ka og P150 aron i-deliver ang imohang passport sa imohang preferred delivery address.
Step 4 - Bio ug picture: Mao na ni ang uwahing step diin kuhaan na ka og hulagway ug finger prints. Wala’y 5 minutos humana ka ani.
Tungod kay lisod ikuha og slot sa DFA Cebu office hinungdan nga daghan ang nipahimulos niining POW.
Gawas sa pasensya, kaon daan ug pangita og lingaw samtang naghuwat sa imong turno. Medyo dugay ang imong huwaton!