SUSPETSADONG kawatan ang napusilan sa off-duty nga pulis human usab kini mamusil sa mga tanod sa barangay Punta Princesa siyudad sa Sugbo.
Sa imbestigasyon sa Homicide Section sa Cebu City Police Office (CCPO) nga samtang nag-roving ang mga tanod sa Country Drive Tres de Abril sa samang barangay pasado alas 3 kagahapon sa kaadlawon, ilang nasigpatan ang duha ka mga lalakeng luwan og biseklita nga may dalang vault cutter.
Sa pagdudahang mga kawatan kini, gisita sa mga tanod ang maong mga lalake apan ang angkas niini ang nibunot og armas dayong pamusil sa mga tanod.
Usa sa mga tanod nga si Mario Barangan ang natapsingan sa iyang suwang.
Dali usab nga nanibat ang mga suspek paingon sa Atillo compound.
Si PO2 Edcel Petecio, sakop sa Swat team sa CCPO, nga nagpuyo duol sa dapit ang niresponde human makadungog sa butobuto.
Uban sa mga tanod, gigukod ni Petecio ang mga suspek ug ilang na-corner ang usa niini apan giingong nisuway na usab sa pagpusil sa pulis maong napugos si Petecio sa pagpusil sa duha ka mga tiil aron pag-immobilize.
Ang maong suspek nagpailang si Renato dela Cruz alyas Rene nga nagpailang taga Ermita apan nasakpan nga siya si Felipe Lanoria, taga siyudad sa Carcar, matod ni SPO2 Cresente Dacillo sa Punta Princesa police station.
Na-recover gikan sa suspek ang .38 revolver nga may duha ka mga kabhang ug upat pa ka mga bala. Apil sa nakuha mao ang biseklita nga ilang gisakyan.
Nakasibat hinuon ang iyang kuyog nga giila lang niya sa ngalang si Junjun Ceballes.
Nagtuo ang mga tanod ug kapulisan nga ang mga suspek paingon nga mangawat tungod sa dala nilang vault cutter. (CPL)