PURSIGIDO ang kapulisan nga ilang masulbad sa labing daling panahon ang linuog nga pagpusil-patay sa usa ka magtutudlo atubangan sa iyang mga tinun-an sa lungsod sa Argao, Sugbo sa milabayng semana.

Sumala sa tinubdan sa Sun.Star Superbalita, ang kapulisan sa Argao ug usa ka espisyal nga unit sa Cebu Provincial Police Office (CPPO) nihimo og hot pursuit operation sa Barangay Valencia, Carcar sa miaging adlaw.

Click here for stories and updates on the Sinulog 2010 Festival.

Ug dason sa tinubdan, usa ang nasikop ug nakaikyas ang laing usa nga gidudahang nalambigit sa krimen.

Apan, ang kapulisan sa Carcar ug opisyal sa CPPO nga nahinabi sa Sun.Star Superbalita wa mokompirmar sa maong taho gawas sa pag-ingon nga ilang gipaningkamotan nga masikop ang mamumuno ni Romeo Aguirre Duran, 52.

Nasayran nga si Gob. Gwen Garcia nimando na sa CPPO sa dinaliang pagsulbad sa kaso nga naghatag og dakong trauma sa mga bata nga nakasaksi sa krimen sud mismo sa ilang lawak sa Grade 6 sa Binlod Elementary School.

Atol sa insidente nga si Duran naglingkod sud sa iyang classroom ug nag-record sa grado sa iyang mga tinun-an, mga pasado alas 3:00 niadtong Martes sa miaging semana.

Apan kalit lang adunay nisud nga wa mailhing lalake ug nangayog katahoran dayog kuot sa iyang bulsa ug gipusil si Duran.

Ang biktima naigo sa walang aping ug wa makalapos ang bala nga maoy nakaingon sa iyang hinanaling kamatayon.

Human sa hitabo, ang wa mailhing tawo yanong nigawas ug nisakay sa motorsiklo nga kolor puwa nga nagpaabot nang daan sa gawas uban sa laing tulo pa ka mga lalake.

Mga tinun-an wa usab makabantay sa nawong sa gikatahapan.

Way ebidensya nga nakuha gikan sa dapit nga nahitaboan busa nagtuo ang kapulisan nga rebolber ang gigamit sa pagpusil sa biktima.

Wa pay nadeklarar nga motibo ang kapulisan sa pagpatay kang Duran apan daghan ang anggulo nga ilang gitutokan karon.

Malaumon ang kapulisan masulbad ra ang maong sa di madugay.