NIMANDO na si Presidente Rodrigo Duterte sa paspas nga pag-imbestigar sa kamatayon sa 19 anyos nga dalagang si Ashley Abad. Human mamatay si Ashley, ingon sa niungot ang imbestigasyon sa kapulisan sa iyang kamatayon.
Bisan ang mga tigbalita nga nagsige og follow-up sa mao nga kaso nagduhiraw kon unsa nay lakat niini.
Di na isyu dinhi kon tinuod bang niinom ang dalaga og Ecstasy, usa ka matang sa illegal nga party drugs. Ang importante dinhi mao ang pagkompimar kon kini ba ang drugs nga nakapatay kaniya ug kinsa ang tinubdan.
Makapaguol lang tungod kay wa mokooperarar ang uyab ug kahigalaan sa dalaga, labina niadtong iyang mga kuyog atol sa hitabo. Unta, nikooperar sila sa kapulisan aron mahatagan og katin-awan ug makabaton og hustisya ang pamilyang Abad.
Ang mga ginikanan sa uyab ug kaubanan ni Ashley, nakapangutana ba kaha sa ilang kaugalingon kon sila kaha ang nahitaboan, unsa kahay ilang bation? Mahimong walay kalabutan ang iyang mga higala ug uyab sa hitabo. Apan kon padayon silang maglihaylihay ug magtabon kon kinsa ang tinubdan sa gituohang Ecstasy, sama ra sab hinuon sila og may kalabutan, kana kon illegal drugs ang nakapatay, sa krimen.
Ang mga pulis usab ingon sa nagduha-duha hangtod karon sa pag-imbestigar nga pinugsanay sa uyab ug mga kauban ni Ashley. Hayan nagpanagana sila kay adunahan ang mao nga mga tawo. Kon yano pa lang tingali kini nga mga pamilya, dali ra kaayong mabulingan ang ilang mga ngan, sama sa ubang mga krimen nga wa pa gani klaro ang dagan sa imbestigasyon, maora na sila og guilty.
Karon nga nanghilabot na ang Presidente sa kaso, di na makalikay ang kapulisan sa ilang kaakuhan ug responsibilidad sa pag-imbestigar kay ang hitabo, usa ka krimen, di yano nga kamatayon.