USA sa mga problema sa kabukiran mao ang kakuwang sa signal alang sa mga cell phone kay maihap lang usab ang cell sites. Mao ni ang usa sa mga hinungdan nga lisod ma-contact ang mga biker kon magpabukid na.
Nahinumdom ko sa usa namo ka group long ride diin kaming tanan nanghunong kay ang usa namo ka kauban gitawgan sa iyang asawa. Pwerte niyang pangatarungan nga daghan ang dead spots sa bukid. Usa namo kauban ang nakigsulti sa asawa. Igo na lang ming nangatawa.
Pipila ka mga buwan ang nakalabay, gipatawag sa City Hall ang mga telecom representatives aron sila hangyuon nga magdugang og cell sites aron malukop na sa signal ang kabukiran. Nitangdo sila.
Tuod man, pag-adto nako sa Barangay Guba, akong gisuwayan ang akong Globe number. Naka connect na ko sa internet ug tin-aw kaayo ang signal sa call.
Apan ang Sun maoy wa pay signal. Sumala sa akong nahibaw-an, gipakusgan sa Smart ang ilang presensya sa mao nga dapit. Wa man koy Smart number pa.
Nganong naghisgot ko niini? Kini tungod kay importante kaayo namo ang signal sa cellphones sa kabukiran. Sa gikaingon ko na, sa emergencies gamit kaayo ang cellphone. Kon dunay mahitabo sa ride, dali kaayong makakapanawag og emergency responders ang mga kauban. Duna bayay emergencies nga nahitabo sa mga ride, although panagsa ra.
KAWAT
Daghan na ko makakita og posts sa akong mga higala ug kauban sa biking community nga naghisgot ug nagpahibawo sa biseklita nila nga gikawat. Ang akong higala nga si Clinton Gairanod gikawatan og fat bike nga six-digit ang presyo.
Ambot giunsa sa pagkuha sa kawatan nga taas man ang koral sa ilang balay. Wa ko masayod kon duna ba silay mga iro. Sa amoa hinuon, naa mga iro nga seguradong mopaak kon dunay mamugos og sulod sa among tugkaran kon molayat sa paril ug gate.
Naa sab koy nahibaw-an nga taga amoa nga gikawatan sa iyang biseklita nga gigaid lang makadiyot sa Plaza Independencia, apan pagbalik sa tag-iya wala na.
Sa China, duna silay mga lock sa bike nga maabli lang gamit ang cellphone kay dunay QR code, nga kuhaan nimo og hulagway. Unya, ang biseklita dunay global posititioning system (GPS).
Mahibaw-an sa mga operator asang dapita ang biseklita. Ingon niana sila ka advance. Maayo tingali nga dunay GPS ang matag biseklita nga lisod tangtangon aron masubay asa kini nahimutang.
Kini ra bang biker nga mawagtangan og biseklita, maora sab og nawagtangan og mahal sa kinabuhi. Kay tipik ug kabahin na kini sa iyang kinabuhi. Naa gani ubang mga bana, kuwang na lang patung-an nila sa iyang asawa ang biseklita kon magdulog sila.