Nanghawod sa langoy; 8 pa bulawang medalya gisawom

TAGUM CITY, Davao del Norte -- Gitapos sa swimming team sa siyudad sa Davao ang ilang kampanya pinaagi sa pagkolekta pa og walo pa ka bulawang medalya, upat ka plata ug tulo ka bronse niadtong Biyernes samtang pagka-defending champion pabiling nanguna sa overall medal tally sa naghinapos nga adlaw sa Batang Pinoy 2019 Mindanao Qualifying Leg sa maong adlaw.

Ang mga manlalangoy sa Davao mipadaghan pa sa ilang medalya nga 17 bulawan, 14 plata ug 17 bronse didto sa Davao del Norte Sports and Tourism Complex nga duna nay kinatibuk-ang 42 bulawan, 31 plata ug 47 bronse sa maong adlaw.

Misunod ang lima pa ka nag-unang delegasyon nga mao ang General Santos City (21-25-27), Koronadal City (21-10-6), Davao del Norte (20-21-18) ug Cagayan de Oro City (20-16-34).

Gisilhig tanan sa Davao City ang upat ka bulawan nga nasugal sa futsal competition sa maong adlaw. Dunay unom ka bulawan ang siyudad sa arnis, upat ka bulawan sa athletics, upat ka bulawan sa taekwondo, upat ka bulawan sa karatedo ug 1 matag usa sa chess, dancesports ug tennis.

Si Liaa Margarette Amoguis, 11, tinun-an sa Abbas Orchard Montessori School, mihuman og lima ka bulan ug usa ka plata aron nga molutaw isip Mindanao leg's most bemedalled girl swimmer ug winningest Davao City athlete gisundan ni archer Kristine Madelina Ibag kinsa nikolekta og lima ka bulawan ug duha ka bronse.

Si Amoguis, manghod sa tulo ka mga igsuon sa mga doktor nga si Lowell ug Cynthia, misawom sab og bulawan sa girls 12-under 200m butterfly ug mitay-og sa girls 15-under 200m freestyle relay team ngadto sa golden finish sa maong adlaw. Nakigduyog siya sa maguwang niyang babaye nga si Lora Micah Amoguis, Jodie Tangtatco ug Maiki Samantha Gonzaga.

“I am not happy with my time. I really want to train hard for it (improve time) for the nationals and Palaro. I am very happy I've got five golds and one silver considering this is my last year in 12-under,” tug-an niya, ug dugang nagkanayon nga gipasigarbo niya ang iyang mga kauban.

Si Juliana Marien Villanueva, 14, miangkon sa iyang ikatulong bulawan pinaagi sa paghari sa girls 15-under 400m freestyle. Nitala siya og tulo ka bulawan ug duha ka bronse samtang si Pietro Dominic Requiza miangkon sab sa iyang ikaduhang bulawan human mihari sa boys 12-under 100m backstroke.

Si Ivo Nikolai Enot (boys 13-15 100m backstroke), Alissa Ysabelle Lazarraga (girls 13-15 100m backstroke), Juan Alessandro Suarez (boys 12-under 200m butterfly) ug sa boys 15-under 200m freestyle relay team kang Shem Gabrielle Bello, Chuck Brylle Amparo, Suarez ug Matthieu Adrien Tao nga milabni og bulawan atol sa katapusang adlaw samtang plata ang nakuha nila Lora Amoguis (girls 13-15 100m backstroke), Suarez (boys 12-under 50m freestyle), Maiki Samantha Gonzaga (girls 13-15 50m freestyle) ug Lazarraga (girls 13-15 200m butterfly).

Si Maica Angela Garcia (girls 13-15 100m backstroke), Wilard Marvee Dayaday (boys 13-15 100m backstroke) ug Charles Evan Ubina (boys 13-15) 200m butterfly niuli nga dunay bronse.