TAGUM CITY, Davao del Norte -- Ang Dabawenya nga hawod sa pana nga si Kristine Adeline Ibag mitapos sa iyang kampanya sa Batang Pinoy 2019 Mindanao Qualifying Leg og lima ka bulawan nga medalya ug duha ka bronse aron nga mangulo sa paghakot og medalya sa dakbayan sa Davao sa pagtapos sa archery competition sa Davao del Norte Sports and Tourism Complex sa dakbayan sa Tagum niadtong Biyernes.
Ang Davao City dunay kinatibuk-ang lima ka bulawan, usa ka plata, ug lima ka bronse.
Ang 14-anyos nga si Ibag, Grade 9 sa A.L. Navarro National High School, nidugang og bulawan sa cub girls 720/1440 round sa iyang koleksiyon.
“Kulba. Kapoy. Pero happy ko nakahatag ko medals sa Davao,” butyag niya sa paghinabi sa SunStar Davao.
Si coach Jonathan Josol sa Davao City nagkanayon nga si Ibag, bisan sa iyang mga bulawan nga gidaug, mahimo na unta siyang dekalibreng internasyonal nga atleta nga mitigum og 1,299 puntos sa cub girls 720/1440 round.
“Record itong ginawa ni Kristine. Kung meron lang sanang records ang Batang Pinoy. At her age, pang international na talaga ito,” tin-aw ni Josol, kinsa nanguna sa Davao Archery Club, sa lain nga higaon nga nahinabi siya.
Gisilhig ni Ibag ang mga bulawan sa cub girls 20-meter, 30-meter, 40-meter ug 50-meter distance sayo niini.
Sa Olympic round niadtong Biyernes, iyang giangkon ang bronse sa cub girls category samtang kauban nga si Micah Paulina Limlenco nisungkit sab og bronse sa cadet girls.
Si Ibag, kansang amahan usa ka magtutudlo sa A.L. Navarro National High School, unang nakigtigi sa Batang Pinoy 2016 National Championships nga gihimo sab sa maong lugar apan miuli siyang way medalya.
Sa bag-ohay pa lang nga Davraa Meet 2019 sa Davao City, nakakuha siya og usa ka bulawan.
Ang iyang pagbansay ubos kang kanhi national archery team member Arnold Rojas nakatabang kaniya sa pagbaid sa iyang abilidad. (MLSA)