KADTONG niaging Dominggo, atong nahibaw-an nga adunay duha ka mga pagkabanhaw ang mahitabo sa unahan - ang una ug ang ikaduhang pagkabanhaw.
Ang unang pagkabanhaw mahitabo sa ikaduhang pag-anhi ni Kristo, ug alang lamang kini sa mga matarong.
Ang ikaduhang pagkabanhaw mahitabo pagkatapos pa sa usa ka libo ka mga tuig gikan sa ikaduhang pag-anhi ni Kristo, ug alang lamang kini sa mga dautan.
Atong nasinati nga pagkabanhaw gayud sa mga matarong, uban sa mga buhi nga mga matarong, pagalitunon kita ngadto sa langit (Revelation. 20: 1, 4). Ug sulod usa ka libo ka tuig, kita nga mga matarong mahimong mga hukom. Atong mahibaw-an ang tanang istorya sa mga katawhan nga dili nato makita didto, ang mga rason nganong wala sila naluwas. Ug sa niana, atong ma-affirm ang pagkamatarong sa paghukom sa Diyos batok kanila.
Sa niining panahon, atong masabtan ang tanang hitabo sa kalibutan, ug matubag ang tanan natong mga pangutana.
Paghuman sa usa ka libo ka mga tuig, pagabanhawon sa Diyos ang mga dautan. Mao kini ang ikaduhang pagkabanhaw. Banhawon ang tanang mga dautan aron tumanon ang nagakaigong hustisya alang kanila.
Sa pagkabanhaw sa mga dautan, ipakita sa Diyos ang ilang mga nagkadaiyang kinabuhi. Diha nila makita ang ilang pagbalibad sa mga pamaagi sa Diyos aron makab-ot sila. Makita nila ang mga panahon nga ang mga katawhan sa Diyos naghatag kanila og mga basahon, nag-imbitar kanila sa krusada o pagsimba, sa religious activities, apan wala nila gitagad. Ug ipakita pa sa Diyos kanila ang ilang pagpakasala, dayag ug tago, ug mga higayon nga ilang gitamay ang ubang mga katawhan, labi na gayud kadtong mga kabus (Rev. 20: 11-13).
Human nianang pagpadayag kanila sa ilang dautang kinabuhi, ilang masulti ang pagkamatarong sa paghukom sa Diyos. Ug nianang panahon, walay usa nga makabsan og pagsabot ug pagdawat sa paghukom sa Diyos.
Niyan, ang kalayo gikan sa langit magtugpa kanila, ug magsunog kanilang mga dautan. Mao kini ang gitawag nga executive judgment o final judgment.
Ug paghuman nga mahurot na sila og sunog sa kalayo (Malachi 4: 1, 3), nga maghimo kanila nga mga abo aron mabalik sa yuta, pagabag-ohon sa Diyos kining kalibutan (Rev. 21: 1) ug dinhi na gayud magpuyo ang Diyos uban kanatong Iyang mga katawhan (Rev. 21: 3), hangtud sa kahangturan.
Ang ikaduhang pagkabanhaw, higala, maoy pagkabanhaw nga likayan ta. Atong paningkamutan nga kung mamatay man gyud kita, ang unang pagkabanhaw mao ang atong ma-eksperyensiya.
Magpadayon kita sa pagkinabuhi nga matarong diha Kaniya. Aron nga kung mamatay man gyud ta niining yutaa, sa nahaunang pagkabanhaw gayud kita. Ngadto sa langit, pagalitunon Niya kita, ug hangtud sa kahangturan maglipay kita kauban Niya.
Bisan pa sa hulga sa kamatayon, ang unang pagkabanhaw maoy atong bidlisiw sa paglaum.