NAGPASIDAAN na ang pamuno sa Davao del Sur Police Provincial Office ngadto sa tanang ginsakpan nga nagpa-miyembro sa KAPA (Kabus Padatoon) human nasayran nga pipila ka mga pulis sa probinsiya miapil niini.
Sumala ni Senior Superintendent Alan Manibog, police provincial director, nga gihinabi sa SunStar Superbalita nga iyang gi-warningan ang mga sakop nga di moapil sa ingon niining investment nga nagtanyag og dakong kantidad aron motubo ang ilang kuwarta.
Aduna nay gipagawas nga direktiba ang Camp Crame aron pasidan-an ang tanang kapulisan nga di magpatunto sa mga pyramiding scam apan matud ni Manibog nga wa pa kini nakaabot sa iyang buhatan.
Apan, matud niya nga iya nang gipasubay kon kinsa ang mga pulis nga miapil sa KAPA.
“Wala pa man goy nagreklamo ani pero amo na ning ginasubay, dapat kung naa gyuy reklamo mo-aksiyon ani ang Criminal Investigation and Detection Group, National Bureau of Investigation ug ang AMLAC kung naa bay money laundering (Anti-money Laundering Council) kung naa gyud ni silay time deposit sa mga bangko,” pasabot ni Manibog.
Matud niya nga gipasidan-an na niya ang kapulisan nga di moapil sa KAPA.
“Suspicious man god nang ing-ana god, gi-discourage nako sila nga dili mag-invest. Unya isa pa wala pa may warrant, pero ato nang gipa-verify kay accordingly, out of bail,” asoy ni Manibog.
Niadtong Biyernes, si Chief Superintendent Marcelo Morales nga gihinabi sa TV Patrol Southern Mindanao, nagkompirma nga nagpasidaan na ang ilang national headquarters ngadto sa kapulisan nga miapil niini.
“Yan na man pong mga modus operandi na yan ay matagal ng nag-eexist, kaya naman po muling pinaalalahanan ng mga liderato natin sa national headquarters ng PNP na mag-ingat ang ating mga kapolisan sa pagsali sa mga ganyang scheme na kung saan ay mangangako ng malaking tubo pero sa bandang huli ay panloloko lang pala ang gagawin at bibiktimahin yung ating mga pulis at sa bandang huli ay mawawala lang pala yung kanilang pinagpaguran,” ang pahayag ni Morales.
Bisan ang Anti Scam Unit sa Davao City, nagpasidaan sab nga di magpalinla sa KAPA ug sa Alabel Maasim Small Scale Mining Cooperative (Almamico) diin nagatanyag og 30 porsiyentong tubo sa ilang kuwarta.
Sa Davao del Sur, giingong daghan na ang naprenda og mga kabtangan aron i-donate sa KAPA nga ang opisina anaa sa Matanao, Davao del Sur ug siyudad sa Digos. (Orlando B. Dinoy)