NASUBO si Talomo Police Station commander Chief Inspector Ronald Lao human gipapanubag sila sa Davao City Police Office (DCPO) sa pagpuga sa usa ka piniriso nga ilang gipailawom sa inquest proceedings.
Giingon nga mamahimong makasohan ang duha ka mga pulis kinsa maoy nagdala sa suspek nga si Khalid Zacaria Utak, 50, residente sa Madamba, Lanao del Sur didto sa Hall of Justice niadtong Huwebes.
“Gi pre-charged investigation nato sila, unya ma-file-an gyod ni sila’g kasong grave neglect of duty kay nganong wala nila tarunga og bantay ang suspek,” ingon ni PCI Ronald Lao.
Dugang ni Lao nga posibleng ma-relib ang duha ka mga pulis (wa una gipang-ila) gikan sa ilang serbisyo ug mapailawom kini sila sa Regional Personnel Holding and Accounting Unit (RPHAU) sa Police Regional Office (PRO)-Davao.
Ning kasamtangan, nagpadayon ang manhunt operation sa Talomo PNP ngadto sa mipuga nga piniriso kinsa dunay kaso sa kalapasan sa Republic Act (RA) 9165 kon Comprehensive Dangerous Drugs Act of 2002.
Kahinumdoman, nga dako nalang ang katingala sa duha ka mga pulis human kalit na lang nawala ang ilang gidala nga suspek didto sa korte.