MOABOT ngadto sa P47 million nga balor sa illegal nga drugas ang nasakmit sa mga sakop sa Regional Intelligence Division nga gipangulohan ni Sr. Supt. Remus Medina nga giabagan sa Regional Special Operations Group-7, Mandaue City Police Office ug Philippine Drug Enforcement Agency 7 (PDEA) 7 sa ilang gilusad nga buy bust operation sa usa ka big time drug courier sa Metro Cebu.
Kini na ang labing dako nga nakuha sa kapulisan sa Central Visayas sa dihang gisugdan ang kampanya batok sa illegal nga drugas.
Alas 9 niadtong Biyernes sa gabii, Pebrero 8, ilang nasikop si Charlie Duhaylungsod Fortuna, 29, lumad nga taga siyudad sa Naga, lalawigan sa Sugbo.
Matod ni Sr. Supt. Remus Medina, hepe sa RID 7, nga moabot sa unom ka buwan ang ilang pagpaniid kang Fortuna.
Dihang ilang nasiguro nga siya ang tig deliver sa ilegal nga drugas, nihimo dayon silag buy bust operation.
Usa ka pulis nga nagpatuo nga kustomer ni-transact sa suspek pinaagi sa text message diin sa Plaza Independencia ang ilang gikasabotan nga mag-abot aron adto ang binayranay sa 25 gramos nga gituohang shabu. Human mahatag sa suspek ang gi order nga drugas, nidiretso na sila sa usa ka subdivision sa Barangay Cubacob, siyudad sa Mandaue.
Sa duha ka andanang balay didto nakita sa pulis nga nagpatuong kustomer ang pito ka dagkong putos sa shabu.
Dinhi na nagpaila nga usa siya ka pulis ug gidiretso na sa pagdakop si Fortuna.
Wa na siyay nahimo human nga ang mga nagsunod nga sakop sa RSOG 7 ug mga personnel sa MCPO nisaka na sa balay aron siya dakpon.
Motimbang ang tanan og pito ka kilo sa gituohang shabu nga adunay Dangerous Drugs Board (DDB) value nga P47,000,000.
BODEGA
Matod ni Medina nga ang maong balay gihimo nang bodega sa illegal nga drugas gikan sa Mindanao.
Apan gitug-an ni Police Regional Office (PRO) 7 Director Chief Supt. Debold Sinas nga ila nang nasubay asa gikan ang illegal nga drugas nga moabot sa bodega.
Giingong gikan sa Manila ang shabu ug gipadala kini ngadto sa Ozamis sa Mindanao.
Adunay mopadala niini dinhi sa Sugbo agi sa barkong roro.
Ang pito ka kilo nga shabu kabahin sa 15 ngadto na sa 20 ka kilos nga illegal nga drugas nga naabot sa maong warehouse, apan naapud-apud na sa ilang mga drug pusher sa gawas.
Kini sigun sa nakuha nga listahan nga kon pila ka kilo ang gipadala kanila ug pila ra usab ang nabaligya.
Gitug-an ni Sinas nga nailhan na usab nila ang ubang mga personalidad nga adunay kalambigitan sa illegal nga drugas nga gipadala sa maong warehouse nga wala lang una nganli.
“So, sa pagkakaron, we have identified already sa tag-iya. Gikoan namo kon kinsa gyud ang dako nga suppliers. Kon asa iyang suppliers tapos katong nakuha namo nga seven kilo that’s part of 15 to 20 kilos nga gipadala diri sa atoa,” matod ni Sinas.
Giangkon matod pa, ni Fortuna nga dugay na ang ilang ilegal nga kalihukan nga nagsugod niadtong 2017 pa.
Nihatag na usab kinig impormasyon kon kinsa ang nag-ingganyo niya nga mosulod sa maong trabaho nga mao ra usab ang tag-iya sa maong balay nga gihimong warehouse.
Gisusi sa kapulisan kon unsa nga grupo nasakop silang Fortuna ug ang babaye nga maoy giingong tag-iya sa warehouse.
Limitado lang matod pa ang nahibaw-an ni Fortuna sanglit wa na siya masayod sa transaction gikan sa kaulohan kay ang kadtong babaye na ang nagmaniobra niini.
Niangkon si Fortuna sa mga tigbalita nga igo ra siya sugoon sa pag deliver sa drugas bugti sa suhol nga P15,000.
Iyang silingan sa syudad sa Naga ang nipasulod niya sa maong matang sa trabaho ug wa na siya masayod kon asa gikan ang supply.