CATBALOGAN CITY -- Duha ka menor de edad nga nangawat og alahas ug cellphone gidakop sa kapulisan Sabado sa hapon, Pebrero 9.
Usa nila nasakmitan og kutsilyo ug tulo ka bala sa pusil nga. 9mm.
Giila ang duha nga si alyas Ondoy, 17 ug alyas Maiko, 15, pulos taga Barangay 13 ning dakbayan.
Matod sa report sa Catbalogan Police Station, usa ka Riza Caande, 24, estudyante ang nidangop sa kapulisan bahin sa insidente.
Nisulti ang biktima nga alas 8 sa buntag sa maong adlaw, gikawat ang iyang mga cellphone, wrist watch, ug mini wallet sud sa ilang panimalay.
Dali nga gisusi sa kapulisan ang area ug nihimo og intelligence gathering.
Alas 4:30 sa hapon sa susamang adlaw, nasikop ang duha ka suspek didto ra usab sa barangay diin nahitabo ang pagpangawat.
Positibo nga gitudlo sa biktima si alyas Ondoy kay namay-ongan kini atol sa insidente.
Nakuha gikan sa duha ang upat ka cellphone, tulo ka wrist watch ug mini wallet nga iya sa biktima.
Gawas niini, nakuhaan usab si alyas Ondoy og Sumpak ug upat ka buhing bala samtang nakuhaan si Maiko og usa ka kutsilyo ug tulo ka bala sa kalibre .9mm.
Dunay nahibaw-an ang kapulisan nga ang ginikanan sa usa ka bata anaa sa prisohan apan ila pa kining susihon.
Gipasakaan na og kasong Robbery, Illegal Possesion of Firearms and Ammunition ug kalapasan sa Comelec gun ban ang duha ka bata.
Gumikan kay ubos sila sa children in conflict with the law, naa pa una sila sa kustodiya sa Social Welfare and Development Office.
Padayon nga usab nga gihisgutan sa senado ang pag usab sa age of criminal responsibility.
Base sa Section 6 sa Republic Act 9344 o Juvenile Justice and Welfare Act of 2006, 15 anyos ang minimum age of criminal liability.
Apan buot kini usbon gikan sa 15 ngadto sa 12 anyos. (JKDP)