SUPERBALITA CEBU

Si Val ug si Tina

FRED FUENTES MONTERNEL

Lorega Proper, Cebu City

DIHANG nanggula na ang tanang nanimba sa buntagong misa sa alas nuybe sa simbahan sa Katedral, wa mag-usik og panahon si Val nga misunod ug midip-ig sa babaye nga dugay na niyang gikahinaman nga maila-ila, ilabi na nga namatikdan niya nga kapin na sa bulan nga wala na kini kaubang lalake matag simba.

“Hai, Ma’m! Adto kas prayer room?” Nagpahiyom si Val nga mitimbaya sa babaye.

“Yes, Sir,” sa babaye nga nagpahiyom sab nga milingi ug mitutok kang Val. “Maoy naandan kong tulumanon matag human sa misa.”

Mihunong paglakaw si Val; ingon man ang babaye.

“Pwede bang maila-ila ang suking hinimba sa Katedral?”

“Ha? Aw, okey ra, uy! Ako si Valentina. Tawga lang kog Tina.”

“Ako sab si Valentino. Val ang angga ko.”

Nangatawa silang duha. Wa magdahom si Val nga sangay diay silag ngalan. Nagkatinutokay sila.

“Taudtaod na laging namatikdan kong wala na kay kuyog matag simba, Tina!”

“Bitaw! Two months na nga namatay ang bana kong si Arman, Val!”

“Mao ba? Tayming diay nga gikaila ko ikaw karon nga biyuda na ka, Tina,” mikihat si Val nga salabtunon.

“Yatis! Morag tsikboy ka da, Val! Kuydawog selosan kos imong asawa!”

“Hahaha! sa edad ko karon nga singkwenta, nagpabilin kong ulitawo, Tina.”

“Mao ba? Katalirungan diay ta ug sa namatay kong bana. Tana, manulod na tas prayer room,” agda ni Tina.

“Swerte kining atong panagkaila karong, Tina!”

“Nganong swerte man?” ni Tina.

“Valentine’s Day ron. Busa ikaw ang akong Valentina, ha?”

“He-he-he! Paspasa god nimo, Val!”

Nahilom sila. Unya nanulod sila sa prayer room. Nagtupad sila paglingkod. Nag-ampo si Val nga unta si Tina na ang babaye nga ikauban niya sa kinabuhi nga moabag sa gipundar niyang negusyo, ang five-six sa tanang naninda nga suki niya sa merkado publiko sa siyudad sa Sugbo. Pipila pa ka gutlo dungan silang nanggawas sa prayer room nga madasigon ug mahimut-on.

“Pwede bang dapiton tika og ‘lunch’ sa restawran sulod sa Waterfront Hotel, Tina?”

“Sure, Val! Para nako, sa dugay nang panahon nga nagkakita ta kanunay sulod sa simbahan bisan wa pa ta magkaila, giisip kong dugay na tang nagkasuod.”

“Bitaw! Ug samot na nga nagkaila gyud ta ron, nga biyuda na ka!”

“Hehehe! Gidid-an ra ba kos tulo ko ka anak nga mga propesyunal nga di na gyud makipag relasyon og lain, ilabi na nga duha pa ka bulan nga mitaliwan ang ilang amahan. Pero, bahala na! Yes, Val, ako ang imong Valentina. Ug ikaw ang akong Valentino!”

Ug malipayong nanakay og taksi sila si Val ug si Tina paingon sa Waterfront Hotel aron maniudto. Pagka dali ra nga nagkasinabtanay ang ilang mga kasingkasing niadtong adlawa. (KATAPUSAN)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph