SECTIONS
Monday, April 22, 2019
BAGUIO

Luzano: Tsismis ken bilag nga underwear….bawal????

Karit Ken Kayetket

MAIPARITEN ti agbalaybay kadagiti underwear ken sabong dagiti natarabit a dila – tsismis! Owsss? Wen, pards. Adda maysa a barangay ditoy siyudad ti Baguio ti nagaramid iti ordinansada a maipariten para kadagiti residentesda ti agibilag wenno agbalaybay kadagiti linabaanda nga underwear nangnangruna tay para babbae. Ganern? Wen, apo. Talaga a nakaungetsan dagiti opisyales ti maysa a barangay ditoy siyudad. Siguro ket agkaraiwara wenno nakaron iti pannakaibitaytay dagita nga aruaten iti nadumaduma a suli iti dayta a barangay nangruna kadagiti igid ti kalsada a makitkita ti kaadduan. Tsk tsk...ti bangsitna no dagitay nakabitaytay a nakabilag ket daanen...tay ngay pugsaten ti garterna wenno adda pay lammadan a kandidaton a masuktan. He he...mabalin nga adu ti marriek iti daytoy a tema...ngem ammoyo kadi a dayta a barangay ordinance ket mapagsarsaritaanen iti sapasap a pagilian. Amangan ta dimmanon payen iti sabali a pagilian ti nakuna a kontrobersiya. Kasta met laeng ti isyu iti maysa met a barangay ordinance manipud maysa pay a barangay ditoy siyudad a mangiparpariten iti panag-tsismis. Adal kano dayta kadagiti tsismoso ken tsismosa. Ngem sakbay nga intay saggaysaen dagitoy a bistabistayen....intay man pay pasadaan dagitoy sumaganad a kontrobersiya:

***

Natayen ni President Duterte! Gimluong a kasla gurruod ken kimat a nagkayamkam iti sibubukel a pagilian ken sangalubongan daytoy a damag. Ta sinno koma ti di makigtot no madamagmo a natayen ni Digong! Sus maryusep! Kasano a natay ket nagpigsaan nga agsungsungbat kadagiti interviews dagiti taga-media idi bimmulaga ti nakuna a damag? Tsk tsk...kitaem laeng ti pigsa ti kidag ti social media nga agaramid kadagiti PEKE a damag. Imbag laketdin ta mannakaawat ti presidente. No sabsabali laeng, amangan ta natodasen ti nagaramid iti peke a damag. Awan kanon ti plano ti Malakanyang a sapulen ken pagnakemen ti akin-aramid. Ngem ti pudpudno..sibibiag ken nakakarkaranting ni Digong. Napigpigsan sa pay ngem nuang, he he. ‘Nia metten dagiti kailiantayo nga awan maaramidda. Kabaelandan nga ipadamag a natayen ti sibibiag. Iti panagkunami, dagita dagitay saan a napagustuan ken addaan plano a rippuogen ti administrasyon ni Duterte. Kunada: apay aya a dida lumaban iti legal ken patas? Ti kayatda ket short cut. Haayyy biag....ti akin-aramid dita ket tao nga agtrangkaso no awan mapadakesna wenno awan mai-tsismisna.

***

Saan a tsismis wenno peke a damag daytoy pards. Adda gayam kano karuprupa ni Apo Duterte. Naal-ala nga isuna a talaga agraman kinakuyogna a nagpa-Hongkong a presidente met ti North Korea. Susmaryusep! Isuda a dua, nagkuyog? Wen, pards. Nagkagulo pay dagiti kailiantayo idiay Hongkong idi nasabatda dagitoy a dua. Siyempre, awan escortda wenno sikyo a kaduada. Duada laeng. Sinno ngay ti saan a makigtot ket karuprupada a talaga ti dua a presidente ti pagilian a Pilipinas ken N.Korea. Adda nag-selfie ken adu met dagiti nagrupogrupog a nakipag-picture kenni impersonator a Digong. Gapu iti daytoy, adda nagsaludsod: saan ngata a bawal ti impersonation? Dikam masungbatan apo. Ngem saan aya nga adda dagiti taga-showbiz ti makatulad iti rupa ken pakabuklan dagiti sikat nga artista wenno tattao? Saanda met a nabawalan. Ti laeng ngamin pagamkan dagiti analysts: no ngay kano agaramid iti maikaniwas iti linteg ti impersonator? Saan ngata nga apektado ti kinatao ni Pres. Duterte? Diak

ammo’t sungbatna apo...aguraytayo laengen kadagiti sumaruno a pagteng.

***

Malagiptayo manen ti napasamak a nagsasaruno a panagbomba dita lumaud nangruna iti Katedral idiay Jolo, Sulu. Nasurok iti duapulo dagiti natay (pakairamanan dagiti otoridad) ken nakasugatan iti nasurok sangagasut. Dayta ket idi napasamak ti immuna nga aldaw ti panagbobotos para iti BOL (Bangsamoro Organic Law). Ngem idi bisperas ti maikadua nga election dita Cotabato ken kabangibangna ....adda manen tallo a panagpabettak. Imbag laketdin ta awan nasugatan ken natay. Tsk tsk...ania ngata ti kaipapanan dagita a panagbomba? Iti immuna (Katedral), natuntonen dagiti imbestigadores nga agassawa nga Indonesian (kameng kano ti ISIS) dagiti suicide bombers. Kadagiti simmaruno met a panagbomba wenno panagpabettak ket kunada nga aramid ti BIFF. Kayatna a sawen a kontraenda ti BOL ken Bangsamoro Autonomous Region. Ngem kas ipakita ti resulta ti dua nga aldaw ti election a mangab-abak ti botos a Yes. Maymaysa ti makitami nga implikasyon kadagita nga aramid: dida kabuteng ti Martial Law dita Mindanao. Iti pannakaisursurat daytoy nga espasyo...agtultuloy latta ti gannuat ti military a mangpulbosen kadagiti terorista. Awan dumanan iti pudpudno a gubat ti mapaspasamak dita lumaud. Sapay koma ta mapulbosdan, kunada.

***

Subliantayon, pards ti isyu iti underwear (pan-y). Ditoy siyudad ti Baguio, talaga a naiparit idi ti agbalaybay wenno agibilag kadagiti linabaan dagiti residentes kadagiti parang a disso a kas koma kadagiti igid ti kalsada nangruna kadagiti dalan dagiti turista. Ngem iti panaglabas ti panawen, nalipatandan dayta a pagannurotan. Kasla pagbilagan ti pindang manen dagiti bakrang dagiti babbalay iti amin san a disso. Nakarkaro manen no mano nga aldaw a nagtudo wenno nakuyem santo simmarnaat. Asus, pards...maarkusan dagiti babbalay iti balaybay. Ti angpepna...no dagiti nakasalansan iti makinsango a pagbalaybayan ket dagiti agtatayutay nga underwear (dagiti babbae), mariakusina impusipos. Sanabale, kuna dagiti sutil, no napipintas amin koma dagita. Ngem adda met mailalaok a dagitay beteranon ken dandanin agrupsa. ‘Bag ketdi ta saan a garter laengen ti nabati, he he. No kano makita dagita dagiti turista, natural a mariekda. No makita dagita dagitay agtatakaw iti pan-y ...ay ket kaykayatda. No makita met dagiti manyakis, sus delikado, kabsat amangan ta agsapuldan ti molestiyaenda. Kayatna a sawen, makasulisog gayam dagita nga “appot” wenno “kurtina” ti spareparts. So, masapul a maillemeng. Dayta ti makagapu no apay a napagkaykaysaan dagiti agtuturay iti maysa a barangay ditoy siyudad nga ipariten dagita a demonyo ti mata ken utek. Kuna dagiti mannirip: dagita kano a disso ket dagiti barangay a pagnanaedan kano dagiti addaan trabaho kadagiti nasisipnget a disso iti rabii. Tay ngay kanayonda kano nga agling-et gapu kadagiti floor shows. Natural, adu nga underwear ti kasapulanda. Resulta, nagabsuon nga underwear ti maibalaybay no aglabada. Ganern? Isu ti kunada. Sige...no dita laeng a barangay ti mangiparit, kuna ti maysa a sutil: mapankayo makibalaybay iti kabangibang a barangay! Ngek! Joke lang!

***

Panggep met iti bawal ti tsismis iti maysa a barangay, adu ti umanamong. Kunada: uray no sapapsap koman a pagilian ti pakaimplementaran ti nakuna nga ordinansa. Sobran ti kinaadu dagiti tsismoso ken tsismosa ditoy kagimongan. Nagbalin san a bisyo wenno negosyo ti tsismis. Ti banglesna, dag-dag-bawas dagita a tsismis. Ti nasakit, adu dagiti maapektaran gapu iti tsism is. Adu a tao ken pamilya ti madadael. Sanabale koma no ti itsismisda ket tay pudno nga awan surok ken kurangna. Ngem pagay-ayatda met nga itsismis tay palso tapno agprang nga isuda ti bida. Nalaingda ketdi kunam nga ag-research. In short, angawda: nalalawa kano ti abut ti lapayagda ken atitiddog ti dilada. Sus, maryusep, ‘bag laketdin ta natayen daydi lolok. Ta no saan, matsismiska idiay purgatory, impierno ken langit. Manamati daydi lolok iti tsismis ngamin. Idi naitsismis kenkuana nga agpaaramid iti lungon ni lolak uray sibibiag pay...nagpaaramid a talaga tapno agpaut pay ti biag daydi lolak. Aniat napasamak? Immuna a natay daydi lolok! He he...tsismis lang!

Adios mi amor, ciao, mabalos!


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!