TAGUM CITY -- Malampuson nga napanalipdan sa Davao City ang pagka-overall nga kampeyon sa Batang Pinoy 2019 Mindanao Qualifying Leg uban sa pipila ka mga bulawang medalya nga gidaug sa basketball, tennis, athletics, chess, ug baseball niadtong Sabado, Pebrero 9.
Nanghakot ang Davao City og 56 bulawan, 39 plata ug 58 bronse sukad alas dos sa hapon sa maong adlaw, kuwang na lang og duha ka bulawan aron nga motabla sa nakuhang medalya sa Oroquieta City niadtong milabay nga tuig.
Giligsan sa Davao City ang Cagayan de Oro City, 91-59, didto sa Rotary Gym sa siyudad sa Tagum luyo sa bayanihon nga duwa sa mga tinun-an sa Holy Child College of Davao nga si Alexander Gabriel Tila ug Christian Joi Mesias kinsa nagkombuya og 21 puntos matag usa alang sa tim nga gigiyahan ni beterano nga panagpares nila Nestor Sorrosa ug Roger Rabago.
Dali rang nakabalik ang Dabawenyos sa lanay nga pagsugod. "Nag-error ta pero over fatigue ang CDO nag-collapse. At least atong mga bata, patient lang sila."
Kini ang unang titulo sa basketball alang sa Davao City tungod kay karon lang tuiga gilakip ang paugnat sa kusog nga basket.
Ang team, matud ni Sorrosa, dunay siyam ka HCCD nga magduduwa ug tulo gikan sa Jose Maria College.
Samtang nakaangkon og plata ang girls basketball team sa Davao City.
Didto sa Davao del Norte Sports and Tourism Complex, si Dabawenya Bea Burba sa Calinan nilabni og duha ka bulawan sa girls 13-15 200m dash ug 4X400m relay uban sa mga kauban nga sila Princess Arias, Kate Duffy McDowell ug Lissel Bajenting.
Si HCCD netter Andrei Kenny Sing sab nipupo sa iyang ikaduhang bulawan human gipildi ang taga Kidapawan City nga si Joaquin Karl Palo, 6-4, 0-6, 6-3 sa ilang boys singles finals match.
Si Sing kabahin sab sa giporma nga boys team nga mikuha og bulawan sayo niini.
Sa bahin sab ni Dabawenya player Therese Claire Nacito, niyukbo siya ngadto ni Minette Bentillo sa Sultan Kudarat, 1-6, 3-6, aron nga motapos og plata sa girls singles.
Sa chess, nakuha sab ni Wesley Jovan Magbanua ang duha ka bulawan sa boys 13-15 standard ug blitz chess events didto sa Bulwagang Pangkarunungan.
Didto sa Tagum City Beach Volleydrome sa beach volleyball, ang pares sa Davao City nga sila si April Locaberte ug Khalia Sinsuat nakakuha og plata samtang ang boys team nikuha og bronse.
Samtang ang Davao City girls spikers misukol apan nilukmay ngadto sa gagmay apan kuyaw nga Talaingod team, 15-25, 26-28 sa ilang kampeyonatong tigi gihimo sa University of Mindanao (UM) Tagum gym.
Sa bahin sab nila Harold Gapate, Richard Gabatin ug JM Metillo, nanguna sa masanag nga kombati sa Davao City sa boys baseball human nakalamang sa South Cotabato, 2-1.
Ang Cagayan de Oro naa sa ikaduhang puwesto uban sa 33-23-41 nga tali sa medalya gisundan sa General Santos City (27-33-31) ikatulong, Davao del Norte (24-25-24) ikaupat ug Koronadal City (22-12-9) sa ikalima.
Wa pa makapagawas ang Philippine Sports Commission (PSC) og final official medal tally samtang gisuwat ning balita.