MALIPAYON ang katawhan sa Davao del Sur niadtong milabay nga Sabado sa gabii, Pebrero 9, sa dihang nahibalik ang dula sa Philippine Basketball Association (PBA) nga nawala kanila, mga walo ka tuig na ang milabay.
Gisugdan ang construction sa Davao del Sur Coliseum niadtong unang termino ni Governor Dodo Cagas ug natapos kini tunga-tunga sa iyang ikaduhang termino, ug dili kita masayop nakadula lang og katulo ka higayon ang PBA sa maong probinsiya.
Miabot ang mangitngit nga bahin sa kinabuhi sa gobernador, gipriso bisan og walay sala, sulod sa usa ka tuig ug napulo ka bulan, Oktubre 2014, hangtud sa bulan sa Agosto 4, 2016 apan human sa makabungog nga kadaugan pagka-gobernador niadtong 2016 eleksyon sa national ug lokal, gibalik siya sa katawhan sa Davao del Sur.
Samtang wala na sa gahum isip amahan sa lalawigan, ambot ug unsay nakaon ni Governor Claude Bautista nga alegasyong iya mang gipaguba ang coliseum lakip na ang swimming pool, nga dili mana kuwarta gikan sa bulsa ni Dodo Cagas, kuwarta man unta kini gikan sa panudlanan sa probinsiya.
Gigastuhan og mokabat kapin kun kulang sa P14 milyon aron mahibalik ang rubberized sa coliseum wala pa’y labot ang pag-repair sa swimming pool nga padayon karong gitrabaho hangtud nga mahibalik kini sa orihinal nga kahimtang.
Paghibalik sa PBA niadtong Sabado sa gabii, kung diin nagdula ang Ginebra San Miguel ug Black Water, gikahimuot sa katawhan sa Davao del Sur ug ilang gipasalamatan si Dodo Cagas nga matag karon ug unya, malingaw sila sa personal nga dula sa PBA, nga kaniadto sa telebisyon lang nila makita.
Karon, adtuon daw nato ang probinsiya sa Davao del Norte, kay mosugot kita’g sa dili samtang nagkaduol na ang bulan sa Mayo, bisag asa ka dili gyud nato kalikayan ang mga hinungaw sa politika, labi na sa Martes, Pebrero 12, magsugod na ang kampanya sa magpapili pagka-Senador.
Dako ang kadismaya ni Governor Anthony del Rosario, (AGR) sa iyang kaatbang sa politika, tungod kay ang iyang gipanghatag nga bugas niadtong panahon sa kalamidad, alegasyon nga ang 160 nga klase sa bugas giilisan sa ilang kaatbang og bugas nga gibukbok aron lang madaut ang administrasyon sa gobernador.
Matud pa’s tigpaniid, kaya man unta nila mopalit og mga first class nga bugas, aron ihatag sa mga tawo kung gustohon nila, tungod kay wala ma’y pagkahubas ang ilang kwarta?
Gilaliman ka, gibayran na nila ang drama talent sa Cebu para buhatan kuno og drama ang kaagi sa ilang kandidato sa pagka gobernador? Unya bugas nga first class dili kapalit?
Sa katapusan si Davao City Mayor Sara Duterte-Carpio, nagpahimangno na sa tanang mga kawani sa City Hall nga dili matintal sa pag-donate og kuwarta sa Kabus Padatuon (KAPA) tungod kay kini usa ka scam, usa ka pagpangilad, inyo siyang nabati sa TV Patrol niadtong adlaw’ng Biyernes nga dili mag-donate aron dili ma-ilad.