DAGHAN ang mga tawo nga naghinam-hinam kun kanus-a makutay ang tulay gikan Davao City padung Island Garden City of Samal (IGACOS) sa Davao del Norte.
Nahinam ang katawhan tungod dali nalang motabok padung sa maong Isla nga gikonsiderang usa sa pinaka nindot nga isla sa Pilipinas, kay mga birhen ang mga beaches.
Apan niadtong Biyernes, Pebrero 8, gibutyag ni Department of Public Works and Highways (DPWH) Secretary Mark Villar nga di una kini mahinayon karong tuiga gumikan sa mga rason.
Sumala ni Villar, nga magkinahanglan pa kini og taas nga panahon ilabi na nga sa ikatulong kuwarter pa ning tuiga mahuman ang feasibility study nga nagsugod sa miaging tuig.
Giingon sa opisyal nga human sa feasibility study, matigayon pa ang pag-award sa modaug sa bidding alang sa mga kahimanan ug ang paghimo sa design-and-build ug ang procurement.
“Davao-Samal bridge feasibility studies are already ongoing, last year pa ‘yong feasibility study [nag start]. Matatapos siya by third quarter this year. Usually feasibility study takes one year pag malaki ang project so we can expect that by third quarter this year matatapos na,” ingon ni Villar sa ambush interview, Biyernes, Pebrero 8.
Gipasalig niini nga sa 2020 magsugod ang construction ug gipaniguro nga mahuman ang maong multi-billion nga tulay una mahuman ang termino ni President Rodrigo Duterte.
“Yong procurement can start this year baka yong initial, pero yong full construction, next year, pero yong simula this year,” ingon ni Villar sa pakighinabi sa SunStar Davao atol sa inauguration sa slaughter house sa F. Torres Bypass Road.
Ang maong Chinese-funded Davao-Samal Bridge maoy usa sa mga pinakadako nga infrastructure project ubos sa flagship ning kasamtangan nga gobyerno nga “Build, Build, Build” program nga nagtumong aron maablihan ang mga bag-ong dalan alang sa economic growth ug development tali sa duha ka mga siyudad.
“Patatapusin muna namin ang feasibility study and we’ll be ready to implement the bridge,” pasalig ni Villar.
Kung pasultihon ang katiguwang, niadto pa nga mga 70's, daghan na nga politiko ang mipasalig nga makutay ang tulay sa maong Isla apan hangtud karon, walay nahitabo ug taman lang sa mga pasalig.
Unta ning maong plano karon sa administrasyon ni Pangulong Duterte, mao kini ang maghatag og katumanan sa dugay nang gipangandoy sa katawhan sa dapit.