DAVAO DEL SUR -- Aduna'y mga politikong mikontra sa giingong istilo sa pag-kolekta og kwarta sa Kapa Community Ministry International, Inc.
Sumala ni Richelle, 34, taga Digos City, hapit na siyang naaghat nga moapil niini ug gihuwat na lang niya nga maaprobahan ang iyang giutang nga P5 mil aron makabutang sa gitawag nilang 'donasyon' nga maoy puhunan nga duna'y interes nga gitawag sa KAPA nga “love share.”
Sama kaniya daghan pa ang gustong moapil apan nagduha-duha sila sama ni Armand, 45, nga taga Bansalan, Davao del Sur, nga mibati og kabalaka tungod kay miulbo ang isyu sa social media sa gipaguwang scam alert sa Davao City Anti-Scam Unit niadtong milabay nga mga adlaw.
Mismong si Davao City Mayor Sara Duterte-Carpio sab ang nagbutyag nga di makasud sa ilang siyudad ang KAPA ug giawhag ang katawhan nga di magpadala sa mga ingon niining investment scam.
Apan, sa Davao del Sur, pipila ka mga politiko ang milaban sa KAPA nga matud pa sa uban klarong makuha nila ang boto sa mga miyembro niini.
Aduna say kandidato pa lamang apan nagpailang usa siya ka KAPA defender sa tinguha nga mosimpatiya kaniya ang mga sakop bugti sa ilang boto sa umaabot nga piniliay.
Gibana-bana nga 30,000 ka miyembro na sa Kapa sa Davao del Sur sanglit matag adlaw, magdasok ang mga tawo sa ilang opisina sa lungsod sa Matanao.
Sa miaging semana, mismong si PBA Party-list Representative Koko Nograles ang nagbutyag nga pa-imbistigahan niini sa National Bureau of Investigation (NBI) ang KAPA.
Nagtuo si Nograles nga iligal ang operasyon sa KAPA nga aduna na'y daghang miyembro sa Davao Region.
Apan, ang founder sa KAPA nga si Pastor Joel Apolinario, hugot nga mibalibad nga investment ang ilang gikolekta nga kwarta sanglit donasyon kini sa mga miyembro.