GIBALHOG sa prisohan ang usa ka 28 anyos nga lalaki human nga nagbinuang kini pinaagi sa pagsulti nga dunay sulod nga granada ang bag nga gidala niini atol sa pag-inspeksyon dihang pasulod kini sa usa ka mall sa dalang Bajada Davao City, Sabado, Pebrero 9.
Giila ang dinakpan nga usa ka alyas Eddie, installer ug residente sa Marfori Subdivision, ning siyudad.
Base sa imbestigasyon, niadtong Sabado sa hapon dihang pasulod ang suspek sa usa ka mall, girekisa sa lady guard ang iyang dala nga bag.
Samtang gihiling kini sa sekyu, kalit na lamang suma pa nga namulong ang suspek nga dunay sulod nga hand grenade ang iyahang bag, hinungdan nga na ukay ang katawhan ug nangahadlok ang mga tawo sa lugar apil na ang sekyu.
Gilayon nga nangayo og tabang ang sekyu ngadto sa kapulisan nga nadestino sa maong mall hinungdan sa pagkasikop sa suspek.
Ning kasamtangan ang suspek, balhog sa selda sa Sta. Ana Police Station kinsa mag-atubang og kaso didto sa korte.