DIGOS CITY - Usa ka 27 anyos nga lalaki ang napalgan nga wa na'y kinabuhi human naghikog alas 2:00 sa kaadlawon niadtong Sabado, Pebrero 9.
Nailhan ang biktima nga mao si Franklin Llorin Parilla, ulitawo, delivery boy ug molupyo sa Purok Anahaw, Aurora Extension sa siyudad.
Sumala ni Police Superintendent Deozar Almasa, city police director, nga nakit-an ang biktima sa iyang kauban sa trabaho nga nagbitay na kilid sa tangkal sa iro.
Gigamit sab sa biktima ang hikot sa iro aron ibugkos sa iyang liog ug ang pikas tumoy sa ibabaw sa kisame.
Sulti ni Almasa nga sa wa pa mahitabo ang insidente nakigtagay pa og ilimnong makahubog ang biktima sa iyang mga higala sa tindahan sa maong dapit.
Nasayran nga nagpahungaw ang biktima sa iyang gibati human wa sila magsinabtanay sa uyab.
Atol sa imbestigasyon, wa'y nakitang foul play sa insidente hinungdan nga gisulti nilang depresyon maoy hinungdan sa pagpakamatay.
Hilabihan ang kasubong gibati sa pamilya sa biktima ilabi pa nga nahitabo ang insidente lima ka adlaw una ang Valentine's Day.