NAGPAHIMANGNO si Davao City Mayor Sara Duterte-Carpio ngadto sa publiko labot sa migawas nga usa ka financial scam nga giingong nagpasalig og doble nga tubo sa kuwarta.
Nagpaluyo niini ang Securities and Exchange Commission (SEC) nga mipagawas og usa ka advisory niadtong Oktobre 3, 2018 labot sa Kapa (Kabus Padatuon) Community Ministry International, Inc., nga gipangulohan ni Pastor Joel Apolinario nga nagpasalig nga motubo sa 30 percent ang kuwarta sa miyembro nga nag-invest niini og binulan.
Ang grupo nag-orihinal sa Bislig City, Surigao del Sur.
“I suggest for the public to read the advisory because there was an explanation by the Securities and Exchange Commission (SEC) about the activities of KAPA - Kabus Padatuon, and then they should take care of their investments,” sulti ni Mayor Sara sa interview sa mga tigbalita niadtong Biyernes, Pebrero 8.
Giingon ni Mayor Sara nga ang maong scam di na bag-o sa siyudad sa Davao diin niadto naa sab nahitabo nga usa ka pyramiding scheme.
Sa kaso sa KAPA, ang SEC nagsulti nga wala kini ma-register sa Commission isip usa ka corporation ug partnership.
Ang grupo walay primary license butang nga di sila otorisado mohimo og soliciting investments, nga maoy usa sa mga secondary licenses nga anaa ubos sa Section 8.1 sa Securities Regulation Code (SRC).
“Ang amoa lang is gi-amplify namo ang SEC advisory sa katawhan and then ang tawo na ang mo-decide based on the SEC advisory kung unsa ang ilahang decision with regards to their investments ug kuwarta," dugang ni Mayor Sara.
Sa kasamtangan sa Davao City, wala naka-record ang Anti-Scam Unit nga dunay mireklamo nga biktima sa KAPA.
Gidugang ni Mayor Sara nga napahibalo na sab ang pipila ka mga local governments sa Davao region labot niini nga grupo aron ilang mapahibalo sa ilang katawhan.
Giingon sab sa mayor nga kung duna nay mabiktima, moduol lamang sa Anti-Scam Unit sa Davao City aron matabangan sila.
“Of course it’s your decision how you use your money but there is already a warning by the SEC. I hope that they will take time out to read the advisory,” niya pa.
Gipahimangnoan sab ni Mayor Sara ang grupo ug ang pipila ka grupo nga dili mogamit sa iyang pangalan labot niini nga mga investments scam.
“I’d like to inform everyone that I am not connected, I do not participate. I do not know KAPA or the owner of KAPA,” panapos sa mayor.