NAKAKULIT man tuod og kasaysayan ang Philippine Azkals human sa unang higayon nakapakita kini og aksyon sa AFC Asian Cup, apan ang ilang pagsalmot sa kompetisyon nga wala gyud makatilaw og daog nakaapekto sa ilang world ranking sa Fifa.
Ang mga Azkals kinsa napildi sa powerhouse Korea (0-1), China (0-3) ug Kyrgyz Republic (1-3) sa group stage, ang nahagsa ngadto sa ika-123 nga puwesto sa rankinig sa February 2019 nga gipagawas sa International Football Federation.
Kini mi-us-os og pito ka ang-ang gikan sa ika 116 nga luna sa wala pa ang Asian Cup.
Kini sukwahi sa ubang nasod sa Asean sama sa Vietnam ug Thailand nga misaka human sila molampos sa knockout stages.
Ang Vietnamese kinsa nakahatag og saktong labok batok sa Japan sa wala pa sila mapildi, 0-1 sa quarterfinals, nakatikang og usa ka ang-ang ngadto sa ika-99 nga puwesto.
Niini, sila gihapon ang pinakataas og ranking sa mga nasod sa Southeast Asian. Ang Thailand misulbong ngadto sa ika 115 nga luna ug ilang nahulipan ang Pilipinas sa ikaduhang puwesto nga pinakataas og ranking sa Southeast Asia. (JBM)