NAIMUOT ko nga naminaw sa estorya sa mga batan-ong babaye sud sa libre nga biyahe sa bus gikan sa Fuente Osmeña padung sa usa ka mall sa South Road Properties. Ang ilang gihisgutan mao ang umaabot nga selebrasyon sa Valentines Day. May pagkasiaw tong usa nga nagngising nangutana kong petsa katorse sa Pebrero ba gihapon ang adlaw sa kasingkasing ning tuiga. Durong bahakhak sa iyang mga kauban. Siyempre apil sa ilang gi-estoryahan ang date nga mahitabo sa maong adlaw.
May nitimang nga wa siyay ika-date sa maong petsa. Dali dali sab nga nisagbat ang pikoton og mata nga sayon ra daw. Sugton sa wa pay petsa katorse kadtong nanguyab niya. Iyang tubag di siya kay masuko iyang mama. Di daw pauyabuyabon samtang nag-eskwela pa. Nakaingon ko sa akong kaugalingon mao nay anak. Pero kadtong naglingkod sa kinadaplinan nipaambit nga plansado na ang ilang date sa iyang boyfriend. Mangaon daw sila sa restawran unya pagkahuman manan-aw og sine. Ang naglingkod sa tunga nangutana asa daw ato ang iyang ka date. Ang pasabot naa pa diay siyay laing nahibaw-an. Iyang tubag natural kadto gyung maoy gipitik sa iyang kasingkasing. Balik na sab siya og pangutana dala nang sungog, kutob ra kaha mo sa senihan? Ang pikoton og mata nibalik og tingog og niingon pagbantay gyud sis kay basin madisgrasya ka. Simbako! iyang tubag nga daw nasinta.
Di gyud na mahitabo nang naa sa imong hunahunahuna. Nakasaad ra ba ko nga motabang pagpaeskwela sa akong mga manghod. Unsaon nalang kong mamabdos. Ning higayona ang diha sa akong tapad nilanog ang tingog nga nagkanayon, pulos uyab man lang nang inyong gihisgutan. Para uyab uyab ra diay nang Valentines Day? pangutana niya. Asay maayo pamilya maoy inyong hunahunaon unsaon nga sila magmalipayon anang adlawa. Human sa maong estorya kalit lang nahilom silang tanan. Daw gipangtionan og armas nga mobuto kay gihold up. Tak-om ang baba. Hangtod nga naabot mi sa among distinasyon.
***
Kinsa may ginikanan niadtong batan-ona pagka suwerte. Pamilya alang niya ang importante sa Valentines Day. Dili ang gara gara nga maoy sagad reklamo sa mga ginikanan. Kadtong usa nga niingon nga masuko iyang mama sakto sab. Og kadtong naghunahuna nga duna pay mga manghod nga tabangan sa pagpa-eskwela pewerte gyung saktoha. Mao nay giingon nga kalipay og kasakit ang mahimong matagamtaman sa maong adlaw depende sa mga panghitabo. Siguro daghan ta og mahinumduman nga mga panghitabo nga makalipay og makaguol nga mahimong mahinuktukan sa maong petsa. Kong kagul-anan man, ang importante nga nakabangon nata. Kong kalipay man, manghinaot nga napaambit nato ni sa uban.
a mga pamilya nga di kumpleto sa maong adlaw sama sa kasinatian sa niaging pasko og bag-ong tuig atong panghinaot magmalipayon lang gihapon kamo. Sa mga asawa o bana nga naghandum nga ikauban ang ilang mga minshal sa kinabuhi nga nanarbaho sa gawas sa nasod o ba kaha tua madistino sa panggubatan tungod sa gipanumpaan nga serbisyo, basin sa sunod Valentines mahimo na ninyp silang ikauban. Sa mga biniyaan sa kapikas tungod sa nagkadaiyang hinungdan, padayona ang pagpatunhay sa pamilya inubanan sa way paglubad nga gugma nga maoy hinungdan sa atong pagpakabuhi ning kalibutan.