USA ka hamtong nga babaye nga nisud sa usa ka mall nangutana sa security guard, “Unsay gitan-aw nimo sa akong bag?” Tubag sa sikyu, “Baka may baril ma’am.” Matod pas babaye, “Sus, Dong. Kagamay anang akong bag. Di man gani masud ang balde ana, barrel pa.”
Barrel maoy atong gigamit kay ang baril man gud pusil man ang kahulogan sa Tinagalog. Sama sa pork barrel nga sa unang panahon didto sa Estados Unidos, maoy sudlanan sa inasinan nga karneng baboy sa dihang wa pay mga freezer ug refrigerator.
Apan karon ang pork barrel nagpasabot na sa minilyon o binilyon ka pesos nga pundo nga gisaling-it sa mga magbabalaod sa tinuig nga national budget alang sa ilang mga paboritong proyekto sa ilang mga distrito.
***
Sa boto nga 15-5, gipasar sa Senado niadtong Biyernes ang bicameral committee report nga giandam nila ni Senador Loren Legarda ug Camarines Sur Rep. Rolando Andaya Jr. alang sa P3.8-trilyones nga national budget karong tuiga.
Ang nisupak mao sila si Senate Minority Leader Franklin Drilon, Senador Panfilo Lacson, Risa Hontiveros, Bam Aquino ug Francis Pangilinan. Nisupak sila tungod sa P75 bilyones nga pork barrel nga gisaling-it sa national budget.
Matod pa Andaya, siya ug si Legarda nagkauyon nga ibutang ang P75 bilyones sa national budget isip usa ka “funding pool.” Ang P70 bilyones alang sa mga senador – tag P3 bilyones matag usa. Ang P5 bilyones angayon sa 292 ka mga kongresista nga duna nay P160 milyones matag usa kada distrito.
***
Si Senador Lacson niingon nga ang 2019 national budget “pork-ridden, cholesterol-rich” nga gipahipi sa budget sa Department of Public Works and Highways. Tungod tingali kay year of the pig man karong tuiga, nagtuo sila nga karon mao ang tuig sa pork barrel.
“Today, pork barrel presents itself as an evil reincarnate, taunting and tempting us, hiding in the shroud of feigned public service,” matod pa ni Lacson sa usa ka privilege speech.
Matod pa niya, kadaghanan sa mga proyekto mga ‘farm-to-market roads” nga hayan mahimong “farm-to-pocket roads.” “To sum it up in one phrase: from farm-to-market, to farm-to-pocket, to pocket-to-pocket,” matod pa niya.