Usbaw sa pletihan sa Lapu

NANGAYO og rekomendasyon ang Land Transportation Franchising and Regulatory Board (LTFRB) sa National Economic and Development Authority (NEDA) 7 sa miaging semana bahin sa gipangayo nga P2.50 nga umento sa Basak, Lapu-Lapu Jeepney Operators and Drivers Association (Balacjoda) sa minimum nga pletihan sa jeepney.

Matod ni LTFRB 7 Director Eduardo Montealto Jr. gusto mahibawo ang ilang ulohang buhatan sa kasamtangang kahimtang sa ekonomiya sa rehiyon hinungdang nangayo og rekomendasyon sa Neda 7.

Sigon sa direktor tan-awon sa board kon panahon na ba nga aprobahan ang usbaw sa pletihan sa PUJs labi na ningsaka ang presyo sa mga produkto sa petrulyo gumikan sa pagpatuman sa ikaduhang hugna sa excise tax ubos sa Tax Reform for Acceleration and Inclusion (Train) Law.

“Kinahanglan man gud naa sila’y data sa atong economics. Sakto ba ang ilang i-increase, sakto ba karon nga panahon nga i-implement, i-approve ug pila ba gyud,” sumala ni Montealto dihang nahinabi sa Superbalita Cebu niadtong Sabado, Pebrero 9.

Si Montealto unang nibutyag nga duna siya’y girekomendar kon pila ang usbaw sa pletihan diin wa uyoni niini ang gipangayo sa Balacjoda. Apan wa siya motug-an kon pila.

Niadtong Septiyembre sa miaging tuig pa niduso og petition ang Balacjoda nga nangayo og P2.50 nga umento sa minimum nga pletihan, apan tungod sa sunodsunod nga rollback sa presyo sa mga produkto sa petrulyo, gipugngan una sa LTFRB ang pagpagawas og desisyon bahin niini.

Tungod sa gipatuman nga ikaduhang hugna sa excise tax ubos sa Train Law, giumentohan og P2 ang matag litro sa gas, P1 sa matag litro sa kerosene, P2 sa matag litro sa diesel ug P1 sa matag kilo sa liquefied petroleum gas (LPG) sugod niadtong Enero 1.

Sumala niini kon aprobahan sa LTFRB ang petition sa Balacjoda, maapil usab sa umento ang ubang mga publikong jeepney.

Si Metudio “Boboi” Belarmino, consultant sa Balacjoda ug tigpamaba sa Cebu Labor Coalition (Celac), unang niingon nga ipatuman ang umento sa pletihan kay wa magkaubos ang presyo sa nag-unang palaliton ug uban pa. (SCG)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph