ADUNAY 14 ka Ecstasy suppliers sa Metro Cebu ug batan-on nga babaye ang ilang “big boss.”

Ang Metro Cebu usa sa mga target market karon sa Ecstasy, ang party drug nga popular sa mga batan-on, ug sagad sa suppliers mga babaye.

Ang binaligyaay ug pinalitay sa imported ug illegal nga druga anha sa party clubs.

Upat ka inila ug ubang party clubs ang gipanid-an karon sa kapulisan sa Cebu.

Kasagaran sa mga mogamit sa Ecstasy kabataan nga gikan sa adunahang pamilya.

Ang usa ka Ecstasy tablet mapalit sa tag P2,000.

Kini nga mga kasayuran gikan sa Police Regional Office (PRO) 7 nga dunay drug matrix nga gipakita ngadto sa Superbalita Cebu correspondent Arnold Y. Bustamante, kinsa nangayo og pagtugot nga mamantala kini.

Tungod niini, gihingusgan na usab sa PRO 7 ang kampanya batok sa Ecstasy. Sukad pa 2018, aduna na silay matrix kinsa kining mga supplier ug kinsa ang ilang ring leaders.

Sa nakuha nga dokumento sa Superbalita Cebu, usa ka batan-ong babaye ang giila karon nga maoy “big boss” sa 14 ka drug suppliers.

Matod ni Chief Supt. Debold Sinas, hepe sa PRO 7, usa sa mga direktang pasahanan og Ecstasy ni “Big Boss” ang tag-iya og hotel nga nahimutang sa Metro Cebu.

Kini nga hotel owner mao usab ang nag-supply kang Kenneth Dong, ang bag-o lang nasikop sa National Bureau of Investigation (NBI) sa Manila.

Si Dong ang tag-iya sa Liv Super Club nga nahimutang sa Mandaue City.

“Di ba naa na syay club? Didto sa iyang club ang distribution area lalo na pag naay big events sa Cebu,” matod ni Sinas.

Hugot ang ilang monitoring sa mga personalidad nga ginganlan sa drug matrix diin kasagaran nila mga babaye.

Kini nga mga babaye nalakip sa gitawag ni Sinas nga “alta sociedad” inila sila sa Sugbo tungod sa ilang kaadunahan ug sa ilang legal nga negosyo.

Ang uban nga anaa sa drug matrix nangasikop na ug nakuhaan og Ecstasy. Apan gawasnon sila kay nakapyansa.

“Kini sila nakagawas na kay nakapyansa man. Kini napud sila ang among ginasundan para mangadakpan napud ni sila,” matod ni Sinas.

Ang confidential Ecstasy matrix namontar gikan sa hiniusang kasayuran sa Philippine Drug Enforcement Agency (PDEA) ug Philippine National Police (PNP), matod ni Sinas.

Giingong padayon ang ilang pag-supply sa drugas sa panahon nga magsingabot ang Sinulog ug kon adunay dagkong kalihukan sa Sugbo.

Upat ka party clubs ang giila sa Regional Intelligence Division (RID) 7 nga asa magpinalitay ang mga manggamitay og Ecstasy.

Si Sr. Supt. Remus Medina, hepe sa Regional Intelligence Division (RID) 7, nitug-an sa Superbalita Cebu nga ang PDEA 7 ug ang PRO 7 nagtinabangay karon alang sa himuon nga operation human nila masikop ang call center agent nga nakuhaan og 15 ka kapsula sa Ecstasy niadtong Pebrero 7, 2019.

Matod ni PDEA 7 Director Wardley Getalla, gikan sa Europe ang Ecstasy sanglit wala pay tighimo niini sa Pilipinas.

Kasagaran gikan sa nasod sa Netherlands ang supply ug ipadala kini sa Pilipinas sakay sa eroplano.

Lisod kini mabantayan sanglit gipangsagol kini sa mga food supplement nga legal ug malampuson kini nga moabot ug makuha sa gipadalhan.

“Usually sa Netherlands or sa other parts ng Europe duon may napaulat na may mga chemist na gumagawa ng mga ganitong illegal drugs na MDMA o methylenedioxymethamphetamine,” matod ni Getalla.

Matod niya, walay Ecstasy laboratory sa Pilipinas apan adunay nangasakmit nga powder amphetamine nga gisagol sa laing component sa drugas.

Kon makuha na sa Big Boss ang supply, iya usab kini nga direktang ipadala sa mga “downline” pinaagi sa lokal nga commercial couriers.

Usa ka 19 anyos nga babaye nag-Ecstasy overdose atol sa kapistahan sa Sinulog sa miaging buwan samtang gatan-aw og concert kuyog ang iyang uyab ug mga higala.

Namatay si Ashley Abad pipila ka oras human nakatomar og Ecstasy. Gipaubos karon sa imbestigasyon ang panghitabo.

Niadtong Huwebes, Pebrero 7, usa ka call center agent maoy ulahing nasikop sa Philippine Drug Enforcement Agency (PDEA) 7 ug nakuhaan og 15 ka tabletas nga Ecstasy.

Nasikop niadtong Huwebes sa gabii, Pebrero 7 mao si Elvin Joseph Laput. Si PDEA-7 Director Wardley Getalla niingon nga ilang nasayran gikan kang Laput nga dunay pagkuyanap karon sa maong druga sa Sugbo.