ASAWA sa uyoan sa self-confesed drug lord sa Central Visayas nga si Franz Sabalones, kinsa newly identified drug player, ang nasikop sa kapulisan sa Centro Police Station sa Mandaue City, atol sa buy-bust operation, Dominggo sa kaadlawon, Pebrero 10, sa sitio Tribunal, Barangay Centro, Mandaue City.
Ang nasikop giila nga si Alma Vilmar Palermo, 46, taga Barangay Ermita, dakbayan sa Sugbo.
Asawa siya ni Isagani Palermo, uyoan sa pag-agawan ni Franz Saballones, kinsa matud sa mga pulis usa sa kanhi hitman ni Sabalones.
Si Isagani ang namatay tungod sa sakit niadtong Mayo 2017 hinungdan nga sukad niadto, magduawan si Alma sa Barangay Centro, diin nagpuyo ang iyang anak.
Gitug-an ni P/Chief Insp. Aldrin Villacampa nga una nitumaw ang iyang pangan human nga niabot na og lima sa ilang mga dinakpan sa maong lugar nga mga street pusher ang itudlo si Alma isip tinubdan sa ilang drugas ug naa sa drug watch list sa barangay.
Giingon nga halos kada gabii kini mouli sa Ermita ug mobalik sa Mandaue sa kaadlawon.
Ug niadtong alas 3:00 sa Dominggo sa kaadlawon, Pebrero 10, giingong gikan kini sa Ermita sa dihang gihimo ang buy-bust sa gawas sa panimay niini sa Tribunal.
Nakuha gikan kang Alma ang 16 ka mga gagmay nga pinakete sa gidudahan nga shabu.
Apan hugot nga nanghimakak si Alma, matud niya nga mogamit lang siya og shabu, apan wala siya mamaligya.
Iya usab giangkon nga adunay higayon nga anaay mga silingan niya diha sa sitio tribunal nga manggamitay usab og shabu ang mohangyo kaniya nga magpadala.
Iyang giangkon nga ang iyang nitaliwan na nga bana nga si Palermo, ig-agaw sa inahan ni Franz, apan gihimakak nga hitman kini o namaligya og shabu ubos sa grupo ni Franz.
Dugang asoy niya nga sa buhi pa ang iyang bana, kada semana kini nga padad-an ni Franz og singko mil pesos isip tabang kanila alang sa maintenance sa tambal.
“Mogamit ko, kana angkon gyud ko ana, transparent man ko, pero kana nga namaligya, wala gyud tawn mi ana oy, datu na unta kaayo mi. Dili na unta mi kinahanglan suportaran sa ako bana sauna ni Franz para sa iyang tambal,” gitug-an ni Alma sa mga tigbalita.
Dugang ni Alma nga wala na sad siya kahibalo kon asa karon si Saballones ug bga sukad namatay ang iyang bana, wala na usab naghatag og sustento kanila si Saballones.
Kasamtangan nga gibalhug sa Mandaue City Police Office detention cell si Alma, samtang nagpaabot nga mapasaka na ng tukmang kaso batok kaniya.