SECTIONS
Monday, April 22, 2019
SUPERBALITA CAGAYAN DE ORO

Todino: Limitahan ang Chinese worker

Pro Bono

NUNOT sa report pagkasikop sa usa ka Chinese national tungod sa paglabay sa iyang taho ngadto sa polis kay gibabagan kini nga makasud sa tren sa Boni Station sa MRT-3, gipadako ni Bise Presidente Leni Robredo ang isyu pinaagi sa pagkwestiyon niining paghatag og pabor sa mga Chinese national nga makatrabaho sa Pilipinas.

Ni-insister si Robredo kining gipakita nga “special treatment” paghatag og trabaho sa mga Chinese national inay ngadto sa mga Filipino, mao kini usa sa mga hinungdan nganong nagkuwang na og respeto ang mga langyaw sa nasud.

Mahimong insakto si Robredo apan dili kana maoy kinatibuk-ang nahitabo sa atong palibot karon, nagpasabot usa lamang kana sa mga kaso ug dili angay himuong barometro aron basulon nato ang tanan.

Ambot kon nahibaw ba atong bise presidente nga problema usab sa ubang nasud kining pagpatrabaho sa mga Filipino sa ilang dapit?

Pananglit sa Commonwealth of Northern Marianas Islands. Kining gamay nga nasud sa Pacific nga usa ka territory sa Estados Unidos duol sa Guam nahimong dakong hagit kining isyu sa trabaho sa mga Filipino.

Ang lokal nga mga molupyo mireklamo nganong halos pulos mga dayohan, sama sa Filipino, ang nanarbaho sa ilang lugar. Busa, gipasar sa ilang gobiyerno ang balaud nga nagmando sa pag-hire og mga local resident o U.S. citizen ngadto sa 30 porsiyento nga gidaghanon sa matag establisyemento.

Apan, wa gihapon masulbad ang problema. Ngano man? Duna may mga trabaho nga dili mahimo sa mga local resident busa mo-hire gyud sila og foreign worker. Gawas pa niana, dili kontento ang mga local resident modawat og gamay nga sweldo kay pwede man sila moadto sa U.S. mainland ug manarbaho busa gikuha ang mga dayuhan sama sa Filipino ang trabaho nila kay molahutay man kining mga foreign workers og gamay nga suhulan.

Kon atong nuntan kining reklamo ni Robredo, nan mabasol nato atong gobiyerno kon nganong ingon niini ang nahitabo sa atong pagpangimpleyo og mga dayohan. Ug usa siya sa mabasol niining tanan.

Isip bise presidente sa nasud mangisog unta si Robredo pagduso og polisiya nga maglimit sa pagpatrabaho sa mga dayuhan sa atong nasud aron mahatagan og prayoridad ang mga Filipino. Dili kay mangugat ta sa pagpabuhagay sa atong pagsaway diha sa mga mantalaan ug radio o telebisyon unya walay aksiyon nga gihimo.

Mahimong mapugngan o limitahan sa gobiyerno kining pagpasud sa mga Chinese workers. Kana kon dunay balaud nga magdili sa tanang establisyemento pag-hire, pananglit, sobra sa 20 porsiyento o duha sa matag napulo ka mga trabahante.

Hagiton nato si Robredo nga mao ni ang sundon niya nga lakang. Awhagon niya ang iyang kaalyado nga mga kongresista ug senador pagduso og balaud paglimit sa mga trabahante nga langyaw ug hatagan og prayoridad ang mga Filipino.

Unya, moduso pud siya og dugang ngipon sa balaud aron hingusgan sa Immigration Office kining pagsuhid sa mga iligal nga dayuhan nga nanarbaho ug nag-overstay sa atong nasud.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!