DUNAY mga pulitiko sa barangay ug city level sa Siyudad sa Mandaue, giingong drug protectors.
Ilang mga ngan nalakip sa listahan sa intelligence report nga gihatag sa Ozamis City police ngadto sa Mandaue City Police Office (MCPO).
Apan gitataw ni MCPO Director Julian Entoma nga way kandidato sa 2019 elections nga nalakip sa listahan.
Gawas sa mga opisyal, duna say supporters.
Ila pa hinuon nga i-validate ang impormasyon.
Gawas nga dunay protector, giangkon ni Entoma nga adunay lugar sa Mandaue City nga gihimo nga tagoanan ug bodega sa mga shabu sa Parojinog drug syndicate.
Namahayag niini si Entoma human nasikop sa Regional Special Operations Group (RSOG) niadtong gabii sa Pebrero 8, si Charlie Duhaylungsod Fortuna, 24, taga Brgy. Inayagan, City of Naga.
Si Fortuna nakuhaan og P48 milyones nga balor sa shabu.
Nasayran sa kapulisan nga ang dakong balay gihimong bodega sa shabu gikan sa Mindanao.
(Basaha usab: https://www.sunstar.com.ph/article/1767600 )
OZAMIS CONNECTION
Si Fortuna ang naglihok pinaagi usab sa mando ni Romy Ramas, piniriso sa Mandaue City Jail.
Si Ramas gilambigit sa mga Parojinog sa Ozamis City.
Mga sakop sa Parojinog drug group, kinsa adunay mga warrant of arrest, sama sa kanhi barangay opisyal sa Ozamis City, ug pag-umangkon sa kanhi mayor, si Marlon Parojinog, nakit-an sa Mandaue City.
“Base sa interrogation niini nga nakuhan og drugas sa Casili, ang nihatag og go-signal kaniya mao ang inmate nga naa sa Mandaue City jail nga ginganlan og Romy Ramas. We dig deeper ni Ramas, nahibaw-an nga connected sa Ozamis group, nga may labot sa drugas, kaya dili nato mabalewala kon duna karoy gi-bodega diha sa Mandaue City. Plus pa nga naay initial info nga sighted ang mga Parojinog nga with warrant of arrest, like Marlon Parojinog sighted sa amoa. Gani naa sa intelligence monitoring nga naa pa sa among syudad, ni-monitor sad ta sa Lapu-Lapu City,” tug-an ni Entoma.
Ang maong grupo na usab ang gitudlo karon sa kapulisan nga posibleng likod sa pipila ka mga pagpamusil sa syudad nga naglambigit og motor riding suspect.
Matod ni Entoma nga nakuha nila gikan sa intelligence report sa kapulisan sa Ozamis nga sukad nakapuyo ang mga sakop sa Parojinog sa barangay Cubacub, nasuta nga anaay mga nagpaluyo kanila nga government officials.
Ang mga Parojinog ang giingong nagpasiatab niini sa Ozamis City.
“Barangay opisyal, supporter ug city officials. So, tuloy-tuloy amo pag-monitor. Kon duna gani sila (mga opisyal nga giingong protector) nahibaw-an sa grupo, kon mahimo ila nang ipaabot sa amua. Dili nato paabuton nga kami pay makasakop aning grupo, nya tua ilang pangalan. The more nga ma-validate nato, nga may linkage sila... It can be nga gitintal lang sila panahon sa barangay election, gi-finance sila, until such time gihimo na sila nga as info nga gikan sa Ozamis, gi-mention na sila as their protector,“ pagpasabot ni Entoma.
POSIBLE
Si Bise Mayor Carlo Fortuna niingon nga dugay na silang nasayod niini.
Matod ni Fortuna nga gipahibawo sila sa posibleng kalambigitan sa pipila ka mga barangay official, labina sa barangay elections.
“That’s why we have not slowed down in our campaign. Long before the barangay elections, we were made aware of the involvement of some officials,” matod ni Fortuna sa Superbalita Cebu.
Matod niya nga wa sila molugak sa kampanya batok sa illegal drugs.
Hugot ang ilang suporta sa kapulisan ug Philippine Drug Enforcement Agency (PDEA) 7.
Samtang si Association of Barangay Councils (ABC) president Ernie Manatad niawhag sa kapulisan sa pagsusi og maayo sa impormasyon.
Matod niya seryuso kining mao nga pasangil.