SECTIONS
Monday, April 22, 2019
SUPERBALITA CEBU

Sugilanon: Ubos sa kahayag sa bulan

ANG manag-uyab nga sila si Zaldy ug Riza nagkasabot nga manuroy sa Park Mall. Sabado sa gabii ang ilang gikasabutan kay way klase ug wa silay trabaho sa eskuylahan. Klasmeyt sila sa kursong Accountancy sa University of San Sebastian. Working student sila ug libre sa tuition fee. Sa gabii ang ilang klase. Puro kabos ang ilang mga ginikanan. Ang amahan ni Zaldy nga si Tilano drayber sa dyip pasaheroan. Pito silang managsuon. Ang iyang inahan plain housewife lang. Sa laing bahin ang amahan ni Riza mensahero sa Merido Forwarders. Ang iyang inahan tig-atiman lang sa balay ug nilang lima ka managsuon. Apan kining gugma di man gyud kalikayan, busa nagkasabot sila si Zaldy ug Riza. Kinahanglan disiplinado lang ug dili magpadala sa gibati, kay puro silang gusto nga makahuman og eskuyla.

Tampo-tampo sila sa ilang gastuhan. Ilang kuwarta gikan lang sa ilang subra-subra sa ilang mga bawon nga natigom. Nanihapon lang silag French fries nga giparesan og mango shakes. Basta solo lang nila ang usag usa. Lipay na sila. Kanang way makadisturbo sa ilang pagginunitay sa kamot, panag-estorya, kinumedyahay ug tampuhay og mga sugilanon sa ilang mga pangandoy sa kinabuhi, lipay na sila. Wa lang damha kusog nga milabay ang pipila ka oras. Nanira na ang Park Mall.

Paggawas nila hayag ang bulan. Takdol. May pipila ka bituon nga nagpaduol. Giganahan silang magsuroy-suroy. Nagkasabot sila nga mag-hayk ngadto sa Subandaku. Kon kapuyan na sila, ayha na sila magsabot nga mamauli na. Mosakay og dyip si Riza para Lapu-Lapu diin tua siya magpuyo uban sa iyang ginikanan. Si Zaldy mosakay og dyip para Mabolo diin tua ang iyang pamilya magpuyo. Third year na sila sa kolehiyo ug tulo na ka tuig silang manag-uyab. Kutob lang sila sa hawok-hawok, gakos-gakos, agbay-agbay ug ginunitay sa kamot. Wala gayud sila maghunahuna nga mo-go all the way. Wa man sad silay igong badyet nga ibayad sa hotel o motel.

Dihang nakaagi silag hawan nga luna nga sama kadako sa playground sa ilang eskuylahan, natental silang mosum-ok sa maong kalibunan. Daghan kugon ug bugang nga nanubo ug dunay mga gagmayng kahoy. Bakante ang maong luna. Wa pay natukod nga bilding. Dunay luta sa yuta nga morag agianan sa tawo. Gisubay nila.

“Asa man ta?” matod ni Riza.

“Sulayan ta lang nig sum-ok ang kabugangan. Bugnaw ang hangin. Basin makakita tag nindot nga estambayan ubos sa kahayag sa buwan,” ni Zaldy.

Gisum-ok nila ang kalibunan. Nakita nila sa tunga-tunga niini nga dunay mga bangko ug lantayng kawayan. Duna say mga karton nga binukhad nga puwede ihapin o ibanig.

“Duna gyuy tawo nga nagpuyo dinhi o tig-estambayan, kay duna may lingkuranan ug higdaanan,” ni Riza.

“Mao gyud. Manglingkod sa’ ta,” ni Zaldy.

Daw unawop ang kahayag sa palibot. Ang kahayag lang sa buwan ang midan-ag. Gibati nila ang ka-romantiko sa higayon. Nanglingkod sila. Unya mikalit pagtaligsik. Nanagan sila. Gilatas nila ang kalibunan nga wala mobalik sa ilang agi. Mi-diretso sila padulong sa silangan ngadto sa laing karsada. Paghimuntog nila sa karsada nakakita silag dakong karatula nga may markang ‘MOONLIGHT INN.’ Dunay ‘arrow’ nga ang talinis nga tumoy nagtudlo ngadto sa ilang gigikanan nga kalibunan. Nagtinan-away sila. Nagkinataw-anay.

“Hala, naka-check in diay ta kadiyot sa Moonlight Inn!” ni Zaldy.

“Angayan sab tawgon nga Moonlight Inn, kay ilawom god sa dan-ag sa bulan,” ni Riza.

“Mangita una tag kapasilungan,” ni Zaldy nga migunit sa kamot ni Riza.

“Tana!” ni Riza.

“Mamalik unya ta didto kon maayo ang panahon,” ni Zaldy nga nagpahiyom samtang nagpisil-pisil sa kamot ni Riza.

“Buang!” ni Riza nga mibawos pagpahiyom. Wa siya motukol sa pagpisil-pisil ni Zaldy sa iyang kamot. (KATAPUSAN)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!