ATENSYON sa Sugbo naa karon kang Nel Spencer Tiu, ang uyab sa namatay nga si Ashley Abad tungod sa overdose sa Ecstasy sa usa ka pre-Sinulog party diha sa Cebu Business Club.
Wa pa ko naka-hearing kon nasikop na ba kini karong nagsulat ko sa kulom. Apan sa miaging adlaw pa nimando si Presidente Rodrigo Duterte nga ipakiha ug ipadakop kini.
Gawas kang Tiu, apil sab ang ilang mga kuyog niadtong gahiuna.
Una nakong reaksyon kay nganong mura man og lenient ra si Digong kang Tiu. Tungod ba kay adunahan kini? Kon kabus pa, patay dayon?
Kon hunahunaon sab og tarong, kinahanglang matumbok pa kinsa ang supplier ni Tiu. Di mahimong mohilom lang siya human nation nga siya man mismo ang nagtunol sa Ecstasy sa iyang uyab nga si Ashley.
Naghinamhinam na tingale si Tiu kay nag-abang na gud daan og AirBnb. Matod pa sa usa nako nga amiga nga abogado, iya na lang unta to gipainom og Red Horse. Wa untay ingon niini kangil-ad nga mahitabo.
Tuod man, kinahanglang matumbok na niya kon kinsa ang supplier.
Kon di siya motug-an, maapil siya pagkapriso tungod sa kamatayon sa iyang uyab ug pagkalambigit sa gidiling drugas. Markado na siya.
Tingale, mabawasan ang iyang salaod kon motug-an siya kinsa ang supplier. Apan, mahimong markado na sab siya sa sindikato.
Alang kanako, mas maayo na lang kon motug-an siya sa tinuod. Mas maayong makatabang siya sa pagpukan mismo sa sindikato nga nag-supply og gidiling drugas nga maoy nakapatipi sa iyang girlfriend.
MAMBALING
Makasabot ko sa kapungot sa mga lumolupyo sa Barangay Mambaling tungod sa grabing pagpilit ni suspendidong Kapitan Gines Abellana sa puwesto. Lupig pay tuko.
Dunay nikatag karon nga video sa usa ka komprontasyon nilang Abellana ug acting barangay captain Anne Marie Palomo.
Ambot, sa akong tan-aw kang Kap Abellana, murag di man man madutlan og kaulaw.
TIPDAS
Responsibilidad sa mga ginikanan ang pagsiguro nga mabakunahan ang ilang mga anak labi na batok sa measles kon tipdas.
Makasubo nga duna pay mamatay niining sakit nga duna na untay bakuna. Nganong malimtan man sa ginikanan? Nganong magduhaduha man sa pagpabakuna tungod niadtong nahitabo sa Dengvaxia? (@anol_cebu sa Twitter)