NUNOT niining mando ni Presidente Duterte nga ipadakop ni Niel Spencer Tiu, ang boyfriend ni Ashley Abad, ang 19 anyos nga dalaga kinsa namatay human ma-overdose sa party drug niadtong bisperas sa Sinulog, makapa-abot siya nga mamahimong miserable ang iyang kinabuhi niining umaabot nga mga adlaw. Hangtod karon wala pa gyud mopakita og kooperasyon si Tiu ug ang mga higala niini aron paghatag og katin-awan sa kalabot sa kamatayon ni Ashley.
Si Ashley, nakuyapan human mitumar og party drug nga ecstasy niadtong Enero 19 atol sa usa ka concert diha sa Ayala Business Park. Ang opisyal nga resulta sa autopsy ipagawas sa kapulisan ugmang adlawa. Ambot og unsay rason nganong nagdumili si Tiu ug ang mga higala sa pagpakita og kooperasyon sa kapulisan.
Siya ba ang nagpugos ni Ashley nga motumar sa maong drugas? Wala ba siya makonsensiya sa iyang pagpakahilum? Wala ba siya padamguha ni Ashley? Higala ba lang diay sila panahon sa kalipay?
Niadtong miaging semana, miadto ang mga ginikanan ni Ashley sa Malakanyang ug nakig-kita personal ni Presidente Duterte ug mihangyo sa Presidente nga mo-interbiner sa kaso kay wala kini mo-irog. Hangtod karon wala pay kaso nga napasaka batok sa mga responsable, Matod pa dihay gika-estorya si Digong sa cellular phone og mimando mga ipadakop si Tiu. Mirason ang diha sa pikas linya nga dili puwedeng dakpon si Tiu kay walay kasong napasaka. Apan miingon ang Presidente nga: “Ingna akoy nagpadakop. That’s an order.”
Dili tuod madakop si Tiu nunot sa kamatayon ni Ashley kay wala man siya mapasakai og kaso. Apan daghang paagi nga mapaubos siya sa kustodiya sa kapulisan ug mapugos sa pagbutyag sa tanan niyang nahibaw-an. Nabalaka ko nga mohimo og “shortcut process” ang mga pulis sa pagdakop kaniya. Una, posibling mo-apply og search warrant sa korte ang kapulisan ug rondahon ang ilang panimalay. Ikaduha, puwede siyang dakpon bisan asa og butang-butangan nga namaligya og drugas. Ikatulo, pinaagi sa extra judicial killing. Mas maayo pay mo-surrender na lang ni si Tiu. (bobbygnalzaro@gmail.com)