MIRESULTA na ning pagdiki-diki ug paglikaylikay ni Nel Spencer Tiu ug sa iyang pamilya sa pag-atubang sa mga tinugyanan sa balaod aron magiyahan unta ang imbestigasyon kalabot sa kamatayon sa iyang uyab nga si Ashley Abad, 19.
Si Abad, sigon sa autopsy findings, nahunosan sa iyang kinabuhi human kini ma-overdose sa usa ka gituohang party drug nga gitumar o gipatumar niini atol sa usa ka konsiyerto niadtong Enero 19.
Pipila ka higayon nga giimbitar si Tiu aron unta pagtubag sa mga pangutana nga naglimen sa kamatayon ni Abad kay lagi sila man ang nagkuyog niadtong gabhiona uban sa iyang mga barkada.
Apan unsa bang pagkaunsaa, nga hinigugma man unta niya pero mora man og way pagbati siya niini nga daw sa iya man lang likayan nga mahatagan og hustisya si Abad.
Ug karon nga sa wala nila damha nahimutang na hinuon sila sa apiki nga sitwasyon tungod kay miinterbiner na man si Presidente Rodrigo Duterte sa maong hitabo human nakigkita ang mga ginikanan ni Abad niini tungod sa kalangay sa imbestigasyon sa mga kapulisan.
Gimandoan sa presidente sila si Cebu City Police Chief Royina Garma ug Police Regional Office (PRO) 7 Director Debold Sinas sa pagdakop ni Tiu ug ang mga kauban niini atol sa hitabo.
Aron mahidali ug sa samang higayon mahisubay sa proseso, hangyuon ni Sinas si Philippine National Police (PNP) Chief Director General Oscar Abayalde nga mopagawas og subpoena aron pagsikop ni Tiu ug kaubanan.
Kuyaw og masakyan ni sa mga abusadong pulis ug tingali pa unya og unsay mahitabo niining mga bataa ilabi na ni Tiu.
Kon naingon ani ning ilang kahimtang karon, ang pamilyang Tiu ra usab ang mabasol kay ila mang gitago-tagoan ang ilang anak.