TAGUM CITY -- Sa katapusang utong, ang sepak takraw ug badminton teams niangkon og tag-usa ka bulawang medalya isip “back-to-back overall champion” ang Davao City sa Batang Pinoy 2019 Mindanao Qualifying Leg nga pormal nga gisirad-an niadtong Sabado sa hapon, Pebrero 9, didto sa RDR Gym, Davao del Norte Sports and Tourism Complex sa dakbayan.
Hinungdan nga misaka ang kinatibuk-ang medalya sa Davao City ngadto sa 58 bulawan, 40 plata ug 58 bronse aron nga mapabilin ang overall championship sa usa ka semana nga torneyo nga gipasiugdahan sa Philippine Sports Commission ug gisuportahan sa kagamhanang probinsiya sa Davao del Norte, Pagcor, Department of Education ug Department of Interior and Local Goverment (DILG).
Ang panagpares nila ni Harlene Claire Herbabuena ug Janinah Jaron Panisales naghiusa og kusog aron nga mohari sa badminton girls under-13 doubles human mapildi ang Cagayan de Oro City sa finals didto sa RDR Gym.
Si Panisales nibulsa sab og bronse sa girls singles under-13.
Sila si Maria Francheska Denise Almazan ug Khea Montanez nahilunsa sa bronze sa 15-under girls doubles.
Didto sa University of Southeastern Philippines (Usep) Gym, mga Dabawenyo nga sila si Stephen Dave A. Kilayco, Justine Keth L. Celerinos ug Michael John A. Acelo naluwas sa tigi batok Pagadian City, 2-1, sa boys sepak takraw doubles championship.
Ang Davao team gigiyahan ni Ruel Yataza.
Nahiluna ang Cagayan de Oro City sa ikaduhang puwesto uban sa 33 bulawan, 23 plata, 42 bronzes gisundan sa General Santos City (27-34-33) ikatulo, Davao del Norte (25-26-25) ikaupat, Koronadal City (22-12-9) ikalima, South Cotabato (20-24-21) ikaunom, Cotabato Province (19-13-9) ikapito, Zamboanga City (15-20-29) ikawalo, Iligan City (14-21-29) ikasiyam ug Tacurong City (14-13-11) ikanapulo.
Si Sports Development Division of the City Mayor's Office (SDD-CMO) officer-in-charge Mikey Aportadera, sa pakighinabi sa mga tigbalita didto sa Batang Pinoy 2019 Mindanao Qualifying Leg media center, nagsulti, “I am very much thankful of the performance of athletes. They improved. This is a testament to their commitment to their sports and the support of their families, coaches and trainors.”
Matud niya ang pagdaug sa Batang Pinoy Mindanao overall title alang sa ikaduhang higayon, una sa Oroquieta City sa milabay nga tuig, dako nga butang alang sa siyudad.
“Malalakas ang ibang LGUs. This is my gauge of city athletes' readiness to compete in the national level,” matud ni Aportadera.
Ang swimming team, nga nakakolekta og 17 bulawan, nangulo sa paghakot og medalya sa siyudad gisundan sa arnis ug karatedo nga dunay pito ka bulawan matag tim, athletics nga dunay unom ka bulawan, archery dunay lima bulawan, futsal nga dunay upat ka bulawan, taekwondo nga dunay tulo ka bulawan, tennis ug chess nga dunay duha bulawan matag usa ug usa matag tim gikan sa sepak takraw, badminton, basketball, dancesports ug baseball.
Si PSC chairman William “Butch” Ramirez, atol sa closing ceremonies, nagsulti nga ang Batang Pinoy, nga maoy kinauyokan sa Sports for Peace program sa PSC, magpabilin.
Iya sab nga gipasalamatan ang Davao del Norte alang sa pagpakig-uban isip midumala sa Batang Pinoy 2019 Mindanao Qualifying Leg ug uban pang paningkamot sa PSC uban sa Deped. (MLSA)