Volleyball girls sa Davao niangkon sa platang medalya

SAMTANG nagsaulog ang Talaingod spikers sa ilang nasungkit nga bulawang medalya, ang Davao City girls volleyball team nitulo ang luha sa kahigawad human napildi sa finals sa Batang Pinoy 2019 Mindanao Qualifying Leg sa napuno nga University of Mindanao (UM) Tagum Gym niadtong Sabado, Pebrero 9.

Ang Talaingod, gigiyahan ni Bobby Jones Sinco, nagsulti nga ang kalampusan mao ang katubsanan human misungkit lang og platang medalya sa Davao Region Athletic Association (Davraa) Meet 2019 gihimo sa Davao City niadtong Enero 27 hangtud Pebrero 2.

Si Sinco, sa paghinabi uban sa SunStar Davao, nagkanayon, “First time po naming mag-join sa Batang Pinoy. From our preparation to Davraa Meet, dire-diretso na kami sa Batang Pinoy.”

Iyang gitumbok ang iyang mga magduduwa nga disiplinado ug dako og pagsalig nga mihatag og dalan aron nga modaug sila.

“Tiwala talaga sa sarili. Siguro di talaga para sa amin ang Davraa pero ang Batang Pinoy para sa Talaingod,” pasigarbo ni Sinco.

Gipildi sa Talaingod ang Davao City, 25-15, 28-26, sa championship game nga gisaksihan ni Philippine Sports Commission (PSC) chairman William “Butch” Ramirez, PSC Commissioner Charles Raymond A. Maxey, Davao del Norte provincial sports and youth coordinator Giovanni Gulanes ug Presidential Assistant for Sports Glenn Escandor. Ang anak nga babaye sa naulahi, Irina, nidula alang sa Davao City atol sa tigi. Iyang giabagan ang team sa Davao nga makagukod sa unang set pinaagi sa lima ka service aces.

Apan sila si Ramirez ug Maxey nakitang naghupay sa mga Dabawenyas sa dihang ang team nagtapok human ang kapildihan ug niangkon lang og platang medalya.

Gipasalig ni Maxey nga mahimo gihapon silang moabande ngadto sa national finals sa Oktubre.

Samtang, gidayeg ni Davao coach Henry Labio ang paningkamot sa iyang mga magduduwa, ug nagsulti, “Mga players ko mga bata pa talaga. May mga kulang kami especially sa pag-attack. Kulang skill namin, wala kaming pamatay.”

Hinuon nagpasalamat siya kay miabot sila sa championship round.

“Malaking pasalamat ko sa ground defense na meron kami at nakarating kami sa finals. Next time siguraduhin may magandang laro sa nationals,” pasalig ni Labio sa lahi nga paghinabi.

Ang Davao team gilangkuban nila Rika Sasaki, Alshaila Noro, Allexa Quilaton, Jaben David, Marian Polancos, Khey Aleck Pablo, Cahre Nablea, Jana Igna, Rosmar Evangelio, Katharina Espero ug Johanna Alcuizar.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph