GILAPAK sa Ateneo de Davao University (Addu) nga nibandera sa Davao Region ang Zamboanga Peninsula, 25-9, 25-12, 25-15, aron nga molutaw nga kampeyon sa women's volleyball sa Catholic Educational Association of the Philippines (Ceap) Mindanao 2019 finals didto sa Xavier University Gym sa Cagayan de Oro City tapos sa semana.
Sayo niini nga mga duwa, nakalingkawas ang Davao sa St. Therese College sa Caraga Region, 25-18, 25-23, 25-19, ug gipildi ang Xavier University of Northern Mindanao, 15-12, 25-15, 25-18.
Si Addu coach Shane Alagao nagsulti nga upat ka team nakasulod sa volleyfest nga nagrepresentar sa mga Zamboanga Peninsula, Northern Mindanao, Davao Region, ug Caraga.
Ang team nga dunay daghang daut ideklara nga kampeyon, butyag ni Alagao ngadto sa SunStar Davao pinaagi sa Facebook.
Mihari ang Davao sa maong torneyo nga way pildi sa tulo ka “outings”.
Samtang nikolekta sab ang Davao athletics team og kinatibuk-ang 15 bulawang medalya, siyam ka plata ug tulo ka bronse.
Nidaug sa bulawan mao sila Lyle Marcos (100 meters), Ivandrei Lopez (800m, long jump) Kyann Rule (1500m, 3000m), Alexis Randy Canedo (javelin throw), Julianna Laurel (400m), Maria Mempin (800m, 1500m), Jilla Mae Ligas (3000m), Alleya Jonna Baiño (shot put, javelin throw, discus throw), girls 4x100m relay team ug 4x400m relay team.
Miangkon sa plata mao sila Canedo (shot put, discus throw), Shajed Ko (long jump), boys 4x100m relay team ug 4x400m relay team, Danna Ocular (100m), Julianna Marie Laurel (200m) ug Jilla Mae Ligas (800m, 1500m).